Qazaqstanda taǵy bir bloger ustaldy, dep habarlaidy Dalanews.kz.
"Aq Jaiyq" basylymy málimetinshe, Atyraýda alaiaqtyq jasady degen kúdikpen bloger ustalǵan. Ol jalǵan utys oiyndary men qaiyrymdylyq jasaý jeleýimen oqyrmandardan aqsha jinap otyrǵan.
Politsiia málimetinshe, áiel áleýmettik jelilerde turmystyq tehnika, táttiler jáne zergerlik buiymdar sekildi baǵaly syilyqtary bar lotereialar týraly habarlandyrýlar jariialaǵan. Sonymen qatar, ol kópbalaly otbasyǵa úi salý úshin qarajat jinaý bastamasyn kótergen. Qatysý sharttary boiynsha kórsetilgen shotqa belgili bir somany aýdarý kerek bolǵan.
Aldyn ala derekter boiynsha onyń "belsendiligi" 2023 jyldyń qyrkúieginde bastalǵan. Qazirgi ýaqytta 50-den asa jábirlenýshi anyqtalǵan. Keibir jaǵdailarda zalal somasy 400 myń teńgeden asqan.
"Bul derek boiynsha QR Qylmystyq kodeksiniń 190-babynyń 1-bóligi ("Alaiaqtyq") boiynsha qylmystyq is qozǵaldy. Kúdikti qamaýǵa alyndy, sotaldy tergeý júrgizilip jatyr", - dep jazylǵan basylym málimetinde.
Perizat Qairatqa qatysty is
Perizat Qairat - Biz Birgemiz Qazaqstan qaiyrymdylyq qorynyń tóraiymy, Qazaqstandaǵy belsendi eriktiler qozǵalysynyń jetekshisi retinde tanymal. Ol sý tasqynynan zardap shekkenderge kómek kórsetý, Gaza sektoryndaǵy gýmanitarlyq missiialar jáne basqa da qaiyrymdylyq sharalarymen ainalysyp, qoǵamda bedelge ie boldy.
Alaida 2024 jyly 14 qarashada Qarjylyq monitoring agenttigi Perizat Qairat 1,5 milliardty jymqyrdy degen kúdikke ilingenin habarlady.
Sonymen qatar, ol 2023 jylǵy qarashada Palestina turǵyndaryna gýmanitarlyq kómek kórsetý úshin qarajat jinap, onyń 200 millionyn qaltasyna basqan degen kúdikke ilindi. QMA dereginshe, 2023 jylǵy jeltoqsanda osy aqsha esebinen Perizat Qairat Sensata Plaza elitalyq kesheninen 49 million teńgege úsh bólmeli páter jáne 30 million teńgege Mercedes-Benz EQE 500 4 Matic jańa kóligin satyp alǵan.
2024 jyly 16 qarashada Astana qalasynyń tergeý soty Perizat Qairat 2 aiǵa qamaýǵa alynǵanyn habarlady. Jýyrda Perizat Qairatqa qatysty isti tergeý aiaqtaldy.
