Perizat Qairat isi boiynsha tárkilengen Lexus LX 600 kóligi arnaiy memlekettik organdardyń qaraýyna berilgen, dep habarlaidy dalanews.kz.
Bul týraly Memlekettik múlik jáne jekeshelendirý komiteti Informburo redaktsiiasynyń saýalyna bergen jaýabynda málimdedi.
Memlekettik nómiri 100PKO01 bolatyn qara tústi jol talǵamaityn kólik 2025 jyldyń kúzinde memleket menshigine ótken. Kólik Perizat Qairattyń anasy Ǵaini Alashbaevanyń aǵasynyń atyna tirkelgen. Avtokóliktiń baǵalaý quny – 79,1 mln teńgeden asady.
Buǵan deiin, sáýir aiynda Astanadaǵy Memlekettik múlik jáne jekeshelendirý departamenti kólik Qarjylyq monitoring agenttiginiń (QMA) balansynda turǵanyn habarlaǵan edi. Vedomstvo málimetinshe, Lexus agenttikke 2025 jylǵy 1 jeltoqsanda berilgen.
Alaida keiin QMA bul kóliktiń óz balansynda joq ekenin málimdegen. Osydan keiin redaktsiia Memlekettik múlik jáne jekeshelendirý komitetine resmi saýal joldap, qymbat jol talǵamaityn kóliktiń naqty qaida ekenin anyqtaýǵa tyrysqan.
Komitettiń jaýabyna sáikes, kólik bastapqyda shynymen QMA balansyna bekitilgen. Biraq keiin arnaiy memlekettik organdardyń qaraýyna tapsyrylǵan. Olardyń qatarynda:
– ulttyq qaýipsizdik organdary;
– syrtqy barlaý salasyndaǵy ýákiletti organ;
– Memlekettik kúzet qyzmeti bar.
Degenmen kóliktiń naqty qai organnyń paidalanýyna berilgeni jariialanbady.
Komitet muny «Memlekettik qupiialar týraly» zań talaptarymen túsindirdi.
"Zańnyń 14-babyna sáikes, barlaý, qarsy barlaý, jedel-izdestirý jáne ózge de qyzmet salalaryna qatysty málimetter memlekettik qupiia sanalady. Osyǵan bailanysty kóliktiń naqty balans ustaýshysy týraly aqparat jariia etilmeidi", – delingen resmi jaýapta.
Eske salaiyq, Perizat Qairat 10 jylǵa bas bostandyǵynan aiyrylǵan bolatyn.
