Jelide qazaq tiline qatysty taǵy bir daý shyqty. Bul joly qaraǵandylyq Kira esimdi sportshy qazaq tilin "paidasyz" til degeni úshin keshirim surady, dep habarlaidy Dalanews.kz.
Bári sportshynyń jelidegi pikirge jaýap berýinen bastalǵan. Ol "qazaq tilin bári bilýi mindetti" degen pikirge bul azamattardyń mindeti emes ekenin aitqan.
"Taǵy da qaitalaimyn, Qazaqstanda orys tili jáne qazaq tili dep bólinedi. Orystardyń kóbine bul til men mádenieti qyzyq emes, óz tilińizde sóileńiz. Bir nárse jazýdyń ne qajeti bar, paidasy joq til", - deidi sportshy.
Artynsha jeli qoldanýshylarynyń biri sportshy jattyǵatyn sport klýbyna bul jaǵdai týraly aityp, jaýap berýin talap etken.
Olar sportshylary úshin keshirim surap, profilaktikalyq áńgime júrgizilgenin aitqan.
Jeli reaktsiiasy
Qazaqstandyqtar quqyq qorǵaý organdary men sport ministrligin tegtei bastaǵan. Olar sportshyǵa qatysty shara qoldanýdy surady.
Taǵy bir jeli qoodanýshysy "qazaqtardyń ózinen de bar" deidi.
"Túpki sebebin túsindińizder me nege olai aityp jatqanynyń? Sebebi kóp jerde ózimiz oryssha sóilesemiz, sondaqtanda basqalarda orys tilin biik qoiady QAZAQ tiline qaraǵanda. Jeke meniń oiym".
Endi biri mundai málimdeme jasaityn adamdarǵa aiyppul salý keregin aitady.
"Osyndailarǵa úlken aiyppuldar salý kerek. Kelesi joly oilanatyn bolady".
Artynsha sportshy keshirim surady.
"Dostar, shyn júrekten keshirim suraǵym keledi. Jýyrda men kóptegen adamdardyń kóńiline tigen pikir jazdym. Bul oilanbai, durys emes jazylǵan pikir boldy. Meniń sózderim qazaq tili men mádenietine qorlaý retinde qabyldanýy múmkin ekenin túsinemin.Men Qazaqstanda týyp-óstim. Bul – meniń elim, men buǵan maqtanamyn. Qazaq tili – memlekettik til, ol bizdiń tarihymyzdyń, mádenietimizdiń jáne bolmysymyzdyń bir bóligi. Men ondai pikir aitýǵa haqym joq edi. Bul – meniń jetilmegendigimniń belgisi boldy, jáne men buǵan uialamyn", - deidi sportshy.
Ol bul jaǵdaidan qorytyndy shyǵarǵanyn aitady.
"Qate ketkenimdi túsindirgen barlyq adamdarǵa rizamyn. Men qorytyndy jasadym jáne sózderimde uqypty ári parasatty bolýǵa tyrysamyn. Taǵy da — pikirimmen kóńiline tigen barlyq jandardan keshirim suraimyn. Men úirenip jatyrmyn jáne jaqsyraq adam bolǵym keledi", - deidi ol.
Aita keteiik, jaqynda "Za tebia, Báke" (ZTB) media jobasynyń negizin qalaýshy, mediamenedjer Marǵulan Tursynovtyń basy daýǵa qalǵan bolatyn. Bári onyń Threads jelisinde jazǵan jazbasynan bastalǵan. Qoǵamda onyń málimdemesi áli kúnge deiin qyzý talqylanyp jatyr.
