Óńir basshylyǵy halyqtyń talap-tilegine qulaq asyp, áleýmettik baǵytta ádil saiasat júrgizýge basymdyq berýde.
Oblys ákimi Bolat Baqaýovtyń tapsyrmasy negizinde halyq jii tutynatyn azyq-túliktiń baǵasyn turaqtandyrý jáne baǵa saiasatyna deldardyń aralasýyna jol bermeý jumystary belsendi júrgizilýde.
Bul jaiynda kúni keshe oblystyq kásipkerlik jáne saýda basqarmasy málimdedi.
«Óńirimizdegi áleýmettik mańyzy bar 19 túrli azyq-túlik taýarynyń baǵasyn turaqtandyrý máselesi basqarmamyzdyń turaqty baqylaýynda ekenin habarlaimyz.
Baǵany turaqtandyrý sheńberinde basqarma Pavlodar qalasynyń ákimdigimen birlesip, aýyl sharýashylyq taýar óndirýshilerimen, kóterme jetkizýshilermen 20 memorandým jasasty.
Qala men aýdan ákimdikteri 2019 jylǵa oblystyń 99 áleýmettik dúkenimen «Áleýmettik dúkenderdiń» jumys etýin qamtamasyz etý jónindegi memorandýmdar jasasty. Turaqtandyrý qorynan tómen baǵamen ónim bosatylýda. Apta saiynǵy negizde aýyl sharýashylyǵy jármeńkeleri ótkiziledi», - dedi basqarma mamandary.
Oblystyń statistika departamentiniń derekterine súiensek, biylǵy jyldyń 3-7 maýsym aralyǵynda halyq jii tutynatyn azyq-túlik, kókónistiń baǵalary ájeptáýir tómendegen.
«Aq qyryqqabattyń kelisi 175-ten 160 teńgege (8,6 paiyzǵa), 1-sanatty taýyq jumyrtqasy 233-ten 230 teńgege (1,2 paiyz) deiin tómendedi», - dedi departamentte.
Aita ketelik, budan bólek oblys ákiminiń tapsyrmasy negizinde biylǵy jyldyń 1 maýsymynan bastap elimizdiń ońtústik óńirlerinen kelisi 85 teńge bolatyn baǵamen qyryqqabat jetkizý jumystary júrgizilip, nátijesin berýde.
Pavlodar qalasynyń ákimdigi óz kezeginde mańdaishasynda «áleýmettik dúken» degen jazýy bar 5 áleýmettik pavilon ornatqan tuǵyn. Aldaǵy ýaqytta dál osyndaǵy 3 pavilon salynatyn bolady. Sondai-aq halyqtyq bazarǵa ainalǵan «Zaton» bazarynda 1 áleýmettik bólim jáne «Karavan» bazarynda dál osyndai 3 bólim ashyldy.
