ءوڭىر باسشىلىعى حالىقتىڭ تالاپ-تىلەگىنە قۇلاق اسىپ، الەۋمەتتىك باعىتتا ءادىل ساياسات جۇرگىزۋگە باسىمدىق بەرۋدە.
وبلىس اكىمى بولات باقاۋوۆتىڭ تاپسىرماسى نەگىزىندە حالىق ءجيى تۇتىناتىن ازىق-تۇلىكتىڭ باعاسىن تۇراقتاندىرۋ جانە باعا ساياساتىنا دەلداردىڭ ارالاسۋىنا جول بەرمەۋ جۇمىستارى بەلسەندى جۇرگىزىلۋدە.
بۇل جايىندا كۇنى كەشە وبلىستىق كاسىپكەرلىك جانە ساۋدا باسقارماسى مالىمدەدى.
«وڭىرىمىزدەگى الەۋمەتتىك ماڭىزى بار 19 ءتۇرلى ازىق-تۇلىك تاۋارىنىڭ باعاسىن تۇراقتاندىرۋ ماسەلەسى باسقارمامىزدىڭ تۇراقتى باقىلاۋىندا ەكەنىن حابارلايمىز.
باعانى تۇراقتاندىرۋ شەڭبەرىندە باسقارما پاۆلودار قالاسىنىڭ اكىمدىگىمەن بىرلەسىپ، اۋىل شارۋاشىلىق تاۋار وندىرۋشىلەرىمەن، كوتەرمە جەتكىزۋشىلەرمەن 20 مەموراندۋم جاساستى.
قالا مەن اۋدان اكىمدىكتەرى 2019 جىلعا وبلىستىڭ 99 الەۋمەتتىك دۇكەنىمەن «الەۋمەتتىك دۇكەندەردىڭ» جۇمىس ەتۋىن قامتاماسىز ەتۋ جونىندەگى مەموراندۋمدار جاساستى. تۇراقتاندىرۋ قورىنان تومەن باعامەن ءونىم بوساتىلۋدا. اپتا سايىنعى نەگىزدە اۋىل شارۋاشىلىعى جارمەڭكەلەرى وتكىزىلەدى»، - دەدى باسقارما ماماندارى.
وبلىستىڭ ستاتيستيكا دەپارتامەنتىنىڭ دەرەكتەرىنە سۇيەنسەك، بيىلعى جىلدىڭ 3-7 ماۋسىم ارالىعىندا حالىق ءجيى تۇتىناتىن ازىق-تۇلىك، كوكونىستىڭ باعالارى اجەپتاۋىر تومەندەگەن.
«اق قىرىققاباتتىڭ كەلىسى 175-تەن 160 تەڭگەگە (8،6 پايىزعا)، 1-ساناتتى تاۋىق جۇمىرتقاسى 233-تەن 230 تەڭگەگە (1،2 پايىز) دەيىن تومەندەدى»، - دەدى دەپارتامەنتتە.
ايتا كەتەلىك، بۇدان بولەك وبلىس اكىمىنىڭ تاپسىرماسى نەگىزىندە بيىلعى جىلدىڭ 1 ماۋسىمىنان باستاپ ەلىمىزدىڭ وڭتۇستىك وڭىرلەرىنەن كەلىسى 85 تەڭگە بولاتىن باعامەن قىرىققابات جەتكىزۋ جۇمىستارى جۇرگىزىلىپ، ناتيجەسىن بەرۋدە.
پاۆلودار قالاسىنىڭ اكىمدىگى ءوز كەزەگىندە ماڭدايشاسىندا «الەۋمەتتىك دۇكەن» دەگەن جازۋى بار 5 الەۋمەتتىك پاۆيلون ورناتقان تۇعىن. الداعى ۋاقىتتا ءدال وسىنداعى 3 پاۆيلون سالىناتىن بولادى. سونداي-اق حالىقتىق بازارعا اينالعان «زاتون» بازارىندا 1 الەۋمەتتىك ءبولىم جانە «كاراۆان» بازارىندا ءدال وسىنداي 3 ءبولىم اشىلدى.
