Pavlodar qalasynyń turǵyny týǵan ápkesine tiesili zergerlik salonnan T164 mln kóleminde taýar urlap, 7 jylǵa bas bostandyǵynan aiyryldy, dep habarlaidy Dalanews.kz.
Pavlodar qalasynyń qylmystyq ister jónindegi mamandandyrylǵan aýdanaralyq sotynyń úkimine sáikes, K.S. QR Qylmystyq kodeksiniń 189-baby 4-bóligi 2-tarmaǵy (senip tapsyrylǵan bóten múlikti asa iri mólsherde iemdený nemese ysyrap etý) boiynsha kináli dep tanyldy.
«K.S.-ny kináli dep tanyp, 7 jyl merzimge bas bostandyǵynan aiyrý jazasy taǵaiyndalsyn. Jazasyn ortasha qaýipsizdik mekemesinde ótesin. QR QK 74-baby 1-bóligi negizinde jazany óteý 2 jylǵa keiinge qaldyrylsyn», – delingen sot úkiminde.
Qosymsha jaza retinde sottalǵan áiel 5 jyl merzimge materialdyq jaýapkershilikke bailanysty kommertsiialyq uiymdarda qyzmet atqarý quqyǵynan aiyryldy.
Sot materialdaryna sáikes, aiyptalýshy 2023 jyly qumar oiyndarǵa áýestengennen keiin ápkesine tiesili zergerlik salonnan taýar urlai bastaǵan. Birneshe ai ishinde ol dúkennen altyn jáne kúmisten jasalǵan 669 túrli buiymdy – alqa, syrǵa, bilezik, júzik, brosh jáne basqa da áshekeilerdi alyp shyqqan.
Eń qymbat buiym – quny 1 mln teńgeden asatyn «Bismark» órimindegi altyn shynjyr bolǵan. Urlanǵan zergerlik buiymdardy áiel lombardtarǵa ótkizip otyrǵan. Jetispeýshilik kezekti túgendeý barysynda anyqtalǵan.
Keltirilgen materialdyq shyǵyn kólemi 164 mln teńgeni qurady.
Aiyptalýshy 2025 jylǵy 3 maýsymnan 2026 jylǵy 6 aqpanǵa deiin qamaýda bolǵan.
Úkim zańdy kúshine engen joq.
