Pavlodar oblysynyń Aqsý qalasynda qatty turmystyq qaldyqtardy kómý qyzmetin kórsetetin monopolist áriptesterine negizsiz ártúrli tarif qoldanǵany anyqtaldy, dep habarlaidy dalanews.kz.
Básekelestikti qorǵaý jáne damytý agenttiginiń Pavlodar oblysy boiynsha departamenti júrgizgen taldaý barysynda «Aqsý-Poligon» JShS-niń birdei sharttar boiynsha qyzmet alýshylarǵa ártúrli baǵa belgilegeni belgili bolǵan.
Vedomstvonyń málimetinshe, seriktestik Aqsý qalasy aýmaǵynda qatty turmystyq qaldyqtardy kómý qyzmeti naryǵynda 100 paiyzdyq úlespen monopoliialyq jaǵdaiǵa ie.
Anyqtalǵan zańbuzýshylyqtarǵa bailanysty kásiporynǵa olardy joiý týraly habarlama berilgen.
Nátijesinde taraptar qosymsha kelisimder jasap, naryqtaǵy barlyq kontragentter úshin birdei sharttar men tarifterdi belgiledi.
