Pavlodar oblysyndaǵy Bala quqyqtary jónindegi ýákil Sáýle Shákeneva 12 jasta bosanǵan oqýshynyń otbasy týraly aitty, - dep habarlaidy Dalanews.kz.
Otbasy Pavlodar oblysynyń Galkino aýylynda turady. Olar 2019 jyly eki balamen Mońǵoliiadan kóship kelgen.
"Qazaqstanda taǵy 3 bala dúniege keldi, qazir anasy 2022 jyly týǵan kishkentai balanyń kútimi boiynsha demalysta. Anasy oqi da, jaza da almaidy. Tek óz atyn jaza alady, qujattarǵa solai qol qoiady. Otaǵasy 6 synyp bitirgen, eshqandai mamandyq igermegen. Mezgildik jumys retinde mektepte ot jaǵýshy bolyp jumys isteidi. Qazir jumys istemeidi", - dedi Pavlodar oblysyndaǵy Bala quqyqtary jónindegi óńirlik ýákil.
Ata-ana qyzdarynyń júktiligi týraly 3 sáýirde mekteptegi muǵalimderden bilgen. Sol kúni tekseris jasalyp, júktilik rastalǵan. Keiin oqýshy 19 shildege deiin aýdandyq aýrýhanada dárigerlerdiń baqylaýyna alynǵan.
"Aýrýhanada mektep basshylyǵy oqý jylynyń sońyna deiin onlain oqytý uiymdastyrdy. Aýrýhanada bolǵan 3 jarym ai boiy bolashaq ana mektep pedagogikalyq quramynyń jeke qarajaty esebinen kiim-keshek, aiaq kiim, jýǵysh zattar jáne azyq-túlikpen qamtamasyz etildi", - dedi Sáýle Shákeneva.
12 jastaǵy qyz salmaǵy 3 360 gramm bolatyn saý qyzdy ómirge ákeldi.
Sáýle Shákeneva oblystyq perinataldyq ortalyqtan shyqqannan keiin ana men sábidiń odan ári turatyn orny týraly másele jaqyn arada sheshiletinin málimdedi. Ata-anasynyń sózinshe, bul jaǵdaidy bilmegen jáne kúdiktenbegen. Qyzdyń ata-anasy osy jaǵdaiǵa kúdikti sanalatyn týystarymen qarym-qatynasty toqtatqanyn aitqan.
Aita keteiik, jýyrda Pavlodar oblysynda 12 jastaǵy qyz bosanǵany belgili boldy. Ol tamyz aiynda 13 jasqa tolady.
Jábirlenýshiniń týysy kúdikti dep tanylyp, qamaýǵa alyndy.
