2025 jyly Pavlodar oblysynda zańsyz ainalymnan 450 keliden astam túrli esirtki zaty alynǵan, dep habarlaidy Dalanews.kz.
Politsiia dereginshe, qabyldanǵan sharalardyń nátijesinde aimaqtaǵy esirtki ahýalyn turaqtandyrýǵa múmkindik týǵan. Ótken jyly oblysta esirtkige qatysty 241 quqyqbuzýshylyq pen 133 qylmys tirkelgen. Onyń 116-sy esirtki satý deregi bolsa, 7 jaǵdai asa iri kólemde saqtaý faktilerine qatysty.
Pavlodar oblysy politsiia departamenti bastyǵynyń birinshi orynbasary *Bolat Nýrseitov*tyń aitýynsha, júrgizilgen jedel sharalar arqyly shamamen 455 keli esirtkiniń zańsyz ainalymǵa túsýine jol berilmegen.
Sonymen qatar internet arqyly taralatyn esirtki saýdasyna qarsy keshendi jumystar atqarylǵan. «Kiberqadaǵalaý» júiesinde esirtki jarnamasy bar resýrstar buǵattalǵan, «Antifrod» bazasyna 1023 bank kartasy engizilgen. Telegram messendjerinde derekterdi alý boiynsha 126 sanktsiialanǵan qaýly joldanyp, «Kripton» júiesi arqyly 50 kriptokoshelekke qatysty suraý salynǵan.
2025 jyly esirtki qylmystary boiynsha 72 adam ustalyp, olardyń 66-sy qamaýǵa alynǵan. Sonymen qatar qylmystyq jaýapkershilikke 4 kámeletke tolmaǵan tartylǵan. Jedel bólimsheler 12 esirtki jetkizý arnasyn joiyp, 3 internet-narkodúkenniń qyzmetin toqtatty.
Politsiia ókilderiniń málimetinshe, óńirde esirtki qylmysyna qarsy kúres jalǵasyp jatyr. Bul baǵytta jańa tehnologiialar engizilip, aldyn alý jumystaryna eriktiler tartylýda. Halyqty esirtkiniń ziiany men zańsyz ainalymǵa qatysýdyń saldary týraly aqparattandyrýǵa erekshe mán berilip otyr.
