Pavlodar qalasynyń ákimdigi Naýryz merekesin toilaýǵa tanymal ánshiler Roza Rymbaeva men Qairat Nurtasty shaqyrǵaly jatqany týraly aqparat tarady. Eń qyzyǵy - olarǵa qala ákimdigi biýdjetinen aitarlyqtai aqsha bólinetini. Bul týraly jergilikti "Nasha jizn" basylymy jazdy, - dep habarlaidy Dalanews.kz.
Merekelik kontsert 22 naýryzda Ortalyq alańda ótedi dep josparlanypty. Al juldyzdarǵa gonorar retinde qala biýdjetinen jalpy 10 million teńge bólinedi eken.
Bul týraly Óńirlik kommýnikatsiialar qyzmetinde ótken baspasóz máslihatynda Pavlodar ákimi orynbasary Svetlana Gladysheva málimdepti.
"Negizgi soma, árine, bizdiń juldyzdarǵa ketti. Biz Roza Rymbaeva men Qairat Nurtasty shaqyrý óte qymbat ekenin túsinemiz. Olardyń jalpy gonorary - shamamen 10 million teńge", - dep keltirdi basylym Svetlana Gladyshevanyń sózin.
