Qostanai tuqymyna jatatyn "Patron" jylqysy Qazaqstan Respýblikasy At sporty federatsiiasy Kýbogynyń birinshi kezeńinde 2-oryn ielenip, joǵary daiyndyq deńgeiin, basqarýǵa ikemdiligin jáne tehnikalyq turǵydan kúrdeli saiysta básekege qabiletti ekenin dáleldedi, dep habarlaidy Dalanews.kz.
Bul nátije tarihi mańyzǵa ie. Óitkeni Qostanai jylqysy alǵash ret el Kýbogy deńgeiindegi vyezdka jarystarynda júldegerler qataryna endi. Bul jetistik tuqymnyń ámbebaptyǵyn ǵana emes, sondai-aq dástúrli túrde joǵary dáldik pen úilesimdi qozǵalysty talap etetin klassikalyq eýropalyq at sporty túrlerinde de básekege túse alatynyn kórsetedi.
Qostanai jylqysy – elimizde ósirilgen alǵashqy salt miný-arbaǵa jegiletin tuqymdardyń biri ári ulttyq genqorǵa engizilgen erekshe tuqym. XX ǵasyrdyń ortasynda qalyptasqan bul jylqy túri tózimdiligimen, kúsh-qýatymen jáne Qazaqstannyń qatal klimattyq jaǵdaiyna beiimdiligimen erekshelenedi. Buryn ámbebap jumys jáne sport jylqysy retinde paidalanylsa, búginde ol zamanaýi at sporty baǵyttarynda, sonyń ishinde vyezdkada da áleýetin aiqyn kórsetip keledi.
Allur kompaniiasy Qostanai jylqy tuqymyn damytýǵa baǵyttalǵan negizgi seriktesterdiń biri sanalady. Kompaniia uzaqmerzimdi strategiia aiasynda tuqymdy saqtaý, asyldandyrý jáne keńinen tanytý baǵytynda keshendi jumystar júrgizip keledi. Atap aitqanda, asyl tuqym bazasyn damytý, genetikalyq áleýetin jaqsartý, zamanaýi jattyqtyrý ádisterin engizý arqyly jylqylardy ulttyq jáne halyqaralyq jarystarǵa daiyndaý jumystary qolǵa alynǵan. Osylaisha, otandyq at sportynyń damýyna jaǵdai jasalyp, Qostanai tuqymy Qazaqstannyń ulttyq brendi retinde halyqaralyq deńgeide ilgeriletilýde.
"Patronnyń" jetistigi – osy baǵyttaǵy júieli jumystyń naqty nátijesi. Bul tańdalǵan strategiianyń tiimdi ekenin taǵy bir márte dáleldeidi.
Aita keteiik, bul Qostanai jylqylarynyń Allur aiasyndaǵy alǵashqy tabysy emes. 2025 jyly kompaniia komandasy «Uly Dala joryǵy» halyqaralyq marafon-baigesinde jeńiske jetip, otandyq tulparlardyń uzaq qashyqtyqtaǵy tózimdiligin taǵy bir dáleldegen bolatyn.
Osylaisha, Qostanai jylqysynyń vyezdkada júldeli orynǵa kóterilýi – otandyq jylqy sharýashylyǵy tarihyndaǵy jańa kezeńniń bastaýy. Bul onyń ártúrli baǵyttaǵy zamanaýi at sporty túrlerinde joǵary áleýetke ie ekenin aiqyndai túsedi.
