Indoneziianyń Iava araly mańynda jolaýshylar paromynda shyqqan órt saldarynan keminde bes adam qaza taýyp, 28 adam iz-túzsiz joǵaldy, dep habarlaidy dalanews.kz.
Reuters agenttiginiń málimetinshe, órt jeksenbi kúni Shyǵys Iavadaǵy Sýrabaia qalasynan Ońtústik Sýlavesidegi Makasar qalasyna bet alǵan KM Mutiara Sentosa paromynda shyqqan. Oqiǵa Madýra aralynyń mańynda bolǵan. Parom bortynda barlyǵy 271 adam – jolaýshylar men ekipaj músheleri bolǵan.
Indoneziianyń izdestirý-qutqarý qyzmetiniń málimetinshe, osy ýaqytqa deiin 238 adam qutqarylǵan, bes adamnyń máiiti tabylǵan. Qalǵan 28 adamdy izdeý jumystary jalǵasyp jatyr.
Qutqarý operatsiiasyna Indoneziia áskeri-teńiz kúshteri, politsiia, ulttyq izdestirý-qutqarý agenttigi jáne jergilikti teńiz qyzmetteri jumyldyrylǵan. Izdestirý jumystaryna jeti keme, áskeri korvet, patrýldik keme jáne tikushaq tartylǵan. Qutqarýshylar shamamen 20 mil aýmaqta izdeý júrgizip jatyr. Operatsiia keminde jeti kúnge josparlanǵan jáne qajet bolǵan jaǵdaida taǵy eki aptaǵa uzartylýy múmkin.
Bilik órttiń shyǵý sebepterin anyqtap jatyr. Keibir aman qalǵan jolaýshylardyń aitýynsha, jalyn kólikter turǵan tómengi palýbadan bastalyp, qatty jeldiń áserinen tez taralǵan.
Reuters atap ótkendei, araldardan turatyn Indoneziiada parom kóligi negizgi qatynas quraldarynyń biri sanalady. Alaida elde teńizdegi qaýipsizdik talaptarynyń saqtalmaýyna bailanysty osyndai apattar jii tirkeledi.
