QR Prezıdenti Qasym-Jomart Toqaevtyń qatysýymen 2023 jylǵy 12 jeltoqsanda «Paryz» – 2023 bıznestiń áleýmettik jaýapkershiligi jónindegi jyl saıynǵy respýblıkalyq konkýrstyń, Memleket basshysynyń «Altyn sapa» syılyǵynyń jáne «Qazaqstannyń úzdik taýary» syılyǵynyń jeńimpazdaryn marapattaý rásimi ótti, – dep habarlaıdy Dalanews.kz Abaı oblysy ákiminiń baspasóz qyzmetine silteme jasap.

Abaı oblysyndaǵy 492 qatysýshynyń ishinen iri kásipkerlik sýbektileri arasyndaǵy «Paryz» baıqaýynyń Bas júldesin «Baqyrshyq taý-ken kásiporny» JSHS aldy. Gran-prı júldesi óz salasynda joǵary kórsetkishke jáne korporatıvtik, áleýmettik, ekologıalyq jaýapkershilik qaǵıdattaryn iske asyrýda úzdik nátıjege jetken úmitkerlerge beriledi.

Sonymen qatar, «Paryz» baıqaýynyń «Eńbekti qorǵaý salasyndaǵy úzdik kásiporyn» nomınasıasymen 2-shi oryndy «Semeı montajdaý fırmasy-Imstalkom» JSHS ıelendi.

«ÝK IýNIS» JSHS shulyq-trıkotaj fabrıkasy «óndiristik maqsattaǵy úzdik taýarlar» nomınasıasynda «Qazaqstannyń Úzdik Taýary» respýblıkalyq kórme-konkýrsynyń jeńimpazy atandy.

Baıqaý jeńimpazdary tıisti dıplom jáne baǵaly syılyqpen marapattaldy. Sondaı-aq, laýreattarǵa konkýrs emblemasyn jarnamalyq maqsatta osy ataq berilgen kúnnen bastap úsh jyl ishinde paıdalaný quqyǵy beriledi.