Saltanat Núkenovany óltirdi dep aiyptalyp otyrǵan eks-ministr Qýandyq Bishimbaevqa qatysty sot jaryssózi jalǵasyp jatyr. Sot jaryssózinde barlyq tarapqa sóz berildi. Endigi kezek basty aiyptalýshy Qýandyq Bishimbaevtyń ózine keldi, - dep habarlaidy Dalanews.kz.
Bishimbaevtyń sózine sensek, bolǵan jaitqa ókinedi, tipti kún saiyn Qudaidan keshirim suraidy.
"Birinshi sot otyrysynan bastap aitqanymdy qaita aitqym keldi: bolǵan oqiǵaǵa kinálimin... Qatty ókinemin. Qudaidan kún saiyn keshirim suraimyn. ...Meni bul qaiǵyny sezinbeitin, júregi joq adam dep jatyr. Meni Saltanatty jamandady dep te aiyptady. Biraq men ózim biletin shyndyqty aitýyma týra keldi", - dedi ol.
Ol jas kezinde ózi de qyzynan airylǵanyn, bul aýyr qaiǵyny túsinetinin aityp baqty.
"Men de bir kezderi, jas kúnimde qyzymnan aiyryldym. 23 jasymda eki jasar qyzym aýyryp qaitys boldy. Bul qandai aýyr qaiǵy ekenin túsinemin. Muny salystyrýǵa kelmeitini túsinikti. Biraq eshqashan bireýdi qasaqana óltirgim kelmegen", - dedi ol.
Biraq Bishimbaev buǵan deiin birneshe sot otyrysynda aitqan málimdemesin taǵy da qaitalap, qasaqana óltirdi degenmen kelispeitinin jetkizdi.
"Ádeii óltirgen joqpyn, biraq Saltanattyń ólimine qatysym bar", - dedi ol.
Aita keteiik, Astana qalasynyń mamandandyrylǵan aýdanaralyq sotynda Qýandyq Bishimbaevqa qatysty qylmystyq is boiynsha birneshe sot otyrysy ótti. Ony dúiim jurt Joǵarǵy sottyń YouTube arnasynan onlain qarady.
Azamattyq nekedegi áieli Saltanat Núkenovany óltirdi degen aiyppen sottalyp jatqan eks-ministr Qýandyq Bishimbaevty advokat Leila Ramazanova, Nazken Qusaiynova, Erlan Ǵazymjanovtar qorǵap jatyr.
Al marqum Saltanat Núkenovanyń aǵasy Aitbek Amangeldi men onyń otbasynyń advokattary – Janna Orazbahova men Áliia Omarova.
27 naýryzda eks-ministr Qýandyq Bishimbaevtyń isi boiynsha alqabiler tańdalǵan edi. Alqabiler alqasyna 12 adam irikteldi: 10 – negizgi quram, 2 – qosalqy. Sodan keiin ashyq sot otyrystary bastaldy.
Sonymen qatar, Qýandyq Bishimbaev sotta Saltanat Núkenovany asa qatygezdikpen óltirgenin moiyndamady. Bul oqiǵa 2023 jyly 9 qarashada Astana qalasyndaǵy BAU meiramhanasynda boldy.
Bishimbaevqa eki bap boiynsha aiyp taǵyldy:
- asa qatygezdikpen kisi óltirý (15 jyldan 20 jylǵa deiin nemese ómir boiyna bas bostandyǵynan aiyrý);
- qinaý (4 jyldan 7 jylǵa deiin bas bostandyǵyn shekteý nemese osy merzimge bas bostandyǵynan aiyrý).
Qýandyq Bishimbaevqa qatysty 24 sáýirde ótken sot otyrysynda sot tergeýi aiaqtalǵany belgili boldy. Bishimbaevqa qatysty sot jaryssózi erteń de jalǵasady.
