سالتانات نۇكەنوۆانى ءولتىردى دەپ ايىپتالىپ وتىرعان ەكس-مينيستر قۋاندىق بيشىمبايەۆقا قاتىستى سوت ءجارىسسوزى جالعاسىپ جاتىر. سوت جارىسسوزىندە بارلىق تاراپقا ءسوز بەرىلدى. ەندىگى كەزەك باستى ايىپتالۋشى قۋاندىق بيشىمبايەۆتىڭ وزىنە كەلدى، - دەپ حابارلايدى Dalanews.kz.
بيشىمبايەۆتىڭ سوزىنە سەنسەك، بولعان جايتقا وكىنەدى، ءتىپتى كۇن سايىن قۇدايدان كەشىرىم سۇرايدى.
"ءبىرىنشى سوت وتىرىسىنان باستاپ ايتقانىمدى قايتا ايتقىم كەلدى: بولعان وقيعاعا كىنالىمىن... قاتتى وكىنەمىن. قۇدايدان كۇن سايىن كەشىرىم سۇرايمىن. ...مەنى بۇل قايعىنى سەزىنبەيتىن، جۇرەگى جوق ادام دەپ جاتىر. مەنى سالتاناتتى جاماندادى دەپ تە ايىپتادى. ءبىراق مەن ءوزىم بىلەتىن شىندىقتى ايتۋىما تۋرا كەلدى"، - دەدى ول.
ول جاس كەزىندە ءوزى دە قىزىنان ايرىلعانىن، بۇل اۋىر قايعىنى تۇسىنەتىنىن ايتىپ باقتى.
"مەن دە ءبىر كەزدەرى، جاس كۇنىمدە قىزىمنان ايىرىلدىم. 23 جاسىمدا ەكى جاسار قىزىم اۋىرىپ قايتىس بولدى. بۇل قانداي اۋىر قايعى ەكەنىن تۇسىنەمىن. مۇنى سالىستىرۋعا كەلمەيتىنى تۇسىنىكتى. ءبىراق ەشقاشان بىرەۋدى قاساقانا ولتىرگىم كەلمەگەن"، - دەدى ول.
ءبىراق بيشىمبايەۆ بۇعان دەيىن بىرنەشە سوت وتىرىسىندا ايتقان مالىمدەمەسىن تاعى دا قايتالاپ، قاساقانا ءولتىردى دەگەنمەن كەلىسپەيتىنىن جەتكىزدى.
"ادەيى ولتىرگەن جوقپىن، ءبىراق سالتاناتتىڭ ولىمىنە قاتىسىم بار"، - دەدى ول.
ايتا كەتەيىك، استانا قالاسىنىڭ مامانداندىرىلعان اۋدانارالىق سوتىندا قۋاندىق بيشىمبايەۆقا قاتىستى قىلمىستىق ءىس بويىنشا بىرنەشە سوت وتىرىسى ءوتتى. ونى ءدۇيىم جۇرت جوعارعى سوتتىڭ YouTube ارناسىنان ونلاين قارادى.
ازاماتتىق نەكەدەگى ايەلى سالتانات نۇكەنوۆانى ءولتىردى دەگەن ايىپپەن سوتتالىپ جاتقان ەكس-مينيستر قۋاندىق بيشىمبايەۆتى ادۆوكات لەيلا رامازانوۆا، نازكەن قۇسايىنوۆا، ەرلان عازىمجانوۆتار قورعاپ جاتىر.
ال مارقۇم سالتانات نۇكەنوۆانىڭ اعاسى ايتبەك امانگەلدى مەن ونىڭ وتباسىنىڭ ادۆوكاتتارى – جاننا ورازباحوۆا مەن ءاليا وماروۆا.
27 ناۋرىزدا ەكس-مينيستر قۋاندىق بيشىمبايەۆتىڭ ءىسى بويىنشا القابيلەر تاڭدالعان ەدى. القابيلەر القاسىنا 12 ادام ىرىكتەلدى: 10 – نەگىزگى قۇرام، 2 – قوسالقى. سودان كەيىن اشىق سوت وتىرىستارى باستالدى.
سونىمەن قاتار، قۋاندىق بيشىمبايەۆ سوتتا سالتانات نۇكەنوۆانى اسا قاتىگەزدىكپەن ولتىرگەنىن مويىندامادى. بۇل وقيعا 2023 جىلى 9 قاراشادا استانا قالاسىنداعى BAU مەيرامحاناسىندا بولدى.
بيشىمبايەۆقا ەكى باپ بويىنشا ايىپ تاعىلدى:
- اسا قاتىگەزدىكپەن كىسى ءولتىرۋ (15 جىلدان 20 جىلعا دەيىن نەمەسە ءومىر بويىنا باس بوستاندىعىنان ايىرۋ)؛
- قيناۋ (4 جىلدان 7 جىلعا دەيىن باس بوستاندىعىن شەكتەۋ نەمەسە وسى مەرزىمگە باس بوستاندىعىنان ايىرۋ).
قۋاندىق بيشىمبايەۆقا قاتىستى 24 ساۋىردە وتكەن سوت وتىرىسىندا سوت تەرگەۋى اياقتالعانى بەلگىلى بولدى. بيشىمبايەۆقا قاتىستى سوت ءجارىسسوزى ەرتەڭ دە جالعاسادى.
