Joldaýdyń mańyzy, pármeni onyń der kezinde, tiianaqty oryndalýyna tikelei bailanysty. Memleket úshin strategiialyq máni erekshe bul qujattaǵy tapsyrmalar tyńǵylyqty júzege asqan saiyn Joldaýdyń qundylyǵy arta beredi.
Prezident Qasym-Jomart Toqaevtyń jyl saiynǵy Joldaýlarynan bilim men ǵylym, mektep pen muǵalimder, jastar tárbiesine qatysty másele bir sát te shet qalǵan emes.
Byltyrǵy "Ádiletti Qazaqstannyń ekonomikalyq baǵdary" atty Joldaýynda da Prezident "Jaily mektep" jobasyn jandandyrý, "Ulttyq qor – balalarǵa" jobasyn sapaly júzege asyrý qajettigin qaperge salyp, iske asyrýdyń naqty baǵyt-baǵdaryn kórsetti. Osy tapsyrmalarǵa orai elimizde 400-ge jýyq "Jaily mektep" salý josparlanǵan edi.
Prezident óz Joldaýynda "Sapaly orta bilim alý – árbir balanyń myzǵymas quqyǵy. Mundaǵy eń túiindi sóz – "sapa". Sondyqtan bilim sapasyn jaqsartý jáne muǵalimderdiń biliktiligin arttyrý aýadai qajet", – dedi.
"Jaily mektep" jobasyn júzege asyrý eki kezeńge josparlanǵan. Bul joba elimizdiń bilim salasyn batystyq standartqa jaqyndatýdyń bir qadamy. Ári Finliandiia, Germaniia, Japoniia siiaqty órkenietti elderdiń oqýshylaryna jasalǵan jaǵdaiǵa jetý maqsatynda qolǵa alynǵan shara.
Shynyn aitsaq, Joldaýdan keiin biraz ýaqyt entýziazm boldy. "Jaily mektepter" jemqorlardan túsken qarajatqa salynady degende eki ese qýandyq. Jer-jerlerden osyndai keremet bilim oshaqtarynyń salynyp, balalarǵa esigin ashyp jatqanyn kórgende kókiregimizdi qýanysh kernedi. Sebebi mundai mektepterde balalardyń jan-jaqty sapaly bilim alyp qoimai, kóńil kókjiegin keńeitýine, bilim, ǵylymǵa degen qyzyǵýshylyǵyn arttyrýyna barlyq jaǵdai jasalǵan. Osyndai barlyq múmkindik eskerilgen "Jaily mektepterde" eńbek etý áriptesterimizge de qýanysh syilaityny ras. Dál osyndai igilik Joldaýda josparlanǵandai barlyq óńirlerde jasalsa nur ústine nur bolmaq. Sonyń ishinde Almaty oblysyna da "Jaily mektepke" suranyp turǵan jerler bar. Mysaly Almaty oblysy, Eńbekshiqazaq aýdany, Azat selosynda jaily mektep salý josparlanyp edi. 1923 jyly salynǵan bul mektep balshyqtan soǵylǵan. Óńir halqy osy kóne mekteptiń ornyna salynatyn "Jaily mekteptiń" irgetasy qalanatyn kúndi asyǵa kútip júr. Prezident tapsyrmasy oryndalsa, jaily mektepte bilim alsaq degen balalardyń da armany shyndyqqa ainalady.
Bilim salasyndaǵy máseleler tek "Jaily mektep" salýmen sheshilmeidi. Onyń bastysy menedjment pen kadrlar. Sondyqtan da aldaǵy prezident joldaýynda muǵalimderdiń kásibi biliktiligin arttyrý, ustaz mádenieti men mártebesi, mektepterdegi tártip men mektep ortasyndaǵy psihologiialyq ahýaldy ońaltý sharalary úshin de júieli tapsyrmalar aitylsa quba-qup bolar edi.
Muǵalimderdiń kásibi biliktiligine qoiylatyn talaptar áli de kúsheitilýi tiis. Eger basshysy qyrsyz bolsa on jerden jaily bolsyn ol mektep Prezident júktegen mejeden tabyla almaidy. Sondyqtan Memleket basshysynyń tapsyrmasy nátijeli bolsyn desek, mektep direktorynan bastap, qarapaiym muǵalimderdi jumysqa alý, attestatsiiadan ótkizý tetikteri ashyq konkýrstyq negizde ádilótýi kerek. Aldaǵy memleket basshysynyń joldaýynda ásirese, mektep basshylary, mektep pishology, mekteptiń tárbie isimen ainalysatyn mamandarynyń qyzmetke alyný protseradýrasy qatań baqylaýmen júretindei naqty is-jospar usynylýy tiis dep oilaimyn. Mekteptegi balalardy tamaqtandyrýmen ainalysatyn kompaniialardyń jumysy da kóńil bólýdi qajet etetin sala. Sonymen qatar, bilim salasyndaǵy jemqorlyqtyń jolyn kesý de kezek kúttirmes is. Osyndai ózekti máselelerge sheshimder prezident joldaýynda kórinis tabady dep senemiz.
Sultan SÚLEEV,
Bilim berý isiniń úzdigi
Almaty oblystyq salalyq kásipodaqtar uiymynyń tóraǵasy
