Ózbekstan ishki ister ministrliginiń ofitseri bergen málimet boiynsha, Ráshid Qadyrov qan qysymynyń kóterilgenine shaǵymdanǵan, ol shamamen eki apta buryn aýrýhanaǵa aýystyrlǵan.
Prezident Shavkat Mirziiaev 19 mamyrda Ándijan oblysy Ýgýknor aýdanyna sapary kezinde málimdeme jasap, aldaǵy eki-úsh aida burynǵy bas prokýror ulttyq telearna arqyly halyqtan keshirim suraidy dedi.
– Qazir (burynǵy - red.) bas prokýror barlyq jaqtastarymen birge túrmede otyr. Birneshe milllion dollardan ótkizip jatyr. Eki-úsh aidan soń men onyń barlyq telearnalardan aǵynan jarylǵanyn uiymdastyramyn. Óitkeni ol barlyq jerde jemqorlyq taratqan. Árbir aýdan prokýrorynan 30-40 myń dollardan alyp otyrǵan. Ol – baýkespe ury. Sol sebepti prokýratýra organdaryndaǵy qyzmetkerlerdiń 70 paiyzy jumystan shyǵaryldy. Men onda adal nietti adamdardy taǵaiyndadym. Áldekim satqyndyq jasasa, Qadyrovtyń jolyn qushady, – dedi prezident Shavkat Mirziiaev.
IIM-degi derek kóziniń aitýynsha, burynǵy bas prokýror Ráshid Qadyrov ulttyq telearnalarda aǵynan jarylyp, prezident pen ózbek halqynan keshirim suraýǵa kelisken.
Eske salaiyq, Ráshid Qadyrov biyl 22 aqpanda "aqsha bopsalaý", "qyzmetin asyra paidalaný", "para alý" aiyptary boiynsha ustaldy.
66 jastaǵy Qadyrov Ózbekstannyń bas prokýrory qyzmetine 2000 jyly taǵaiyndalyp, 2015 jyly sáýirde qyzmetinen alynǵan. Biyl 5 naýryzda respýblikanyń ishki ister ministrligi onyń 39 jastaǵy uly Álisher Qadyrovty halyqaralyq izdeýge berdi. Qazirgi kúnge deiin burynǵy bas prokýror men onyń ulyna jarty milliard dollardyń shaǵymdary túsken.
