Ózbekstanmen shekarada ornalasqan «Qaplanbek» ótkizý beketinde uzyn-sonar kezek paida boldy. Bul týraly Qazaqstan UQK málimdedi, dep habarlaidy dalanews.kz.
Vedomstvo málimetinshe, adamdardyń jinalyp qalýyna Ózbekstan jaǵyndaǵy tirkeý júiesindegi aqaý sebep bolǵan.
Másele Ózbekstandaǵy «Navoi» ótkizý pýnktiniń jumysynda týyndaǵan. Sonyń saldarynan azamattar shekaralyq rásimderden jyldam óte almai jatyr.
"Ózbekstan tarapynyń aqparatyna sáikes, qazirgi ýaqytta aqaýlardy joiý jáne ótkizý pýnktiniń jumysyn qalpyna keltirý jumystary júrgizilip jatyr", – dep habarlady UQK.
Qazaqstan jaǵynan «Qaplanbek» ótkizý beketi shtattyq rejimde jumys istep tur. Shekaradan ótýge qatysty eshqandai shekteý engizilmegen.
