Bul týraly Ózbekstannyń buqaralyq aqparat quraldary habarlady.
Ózbekstannyń Qytaidaǵy elshisi Bahtier Saidov pen Qytaidyń Sinopharm Group kompaniiasynyń basqarma tóraǵasy Liý Tszinchjen eki eldiń koronavirýs pandemiiasymen birlese kúresý múmkindikterin talqylady. Atap aitqanda, Qytai jaǵy koronavirýsqa qarsy vaktsinanyń klinikalyq synaǵy eki kezeńde sátti ótkenin habarlady. Vaktsinany China National Biotec Group (CNBG, Sinopharm Group quramyna kiredi) ázirlegen.
«Jaqynda Qytai turǵyndary arasynda úshinshi – qorytyndy synaq bastaldy. Qytai korporatsiiasynyń jetekshisi osyndai synaqty Ózbekstan aýmaǵynda da ótkizýdi usyndy» delingen jergilikti BAQ taratqan aqparatta.
Habarlarǵa qaraǵanda, jańa vaktsinanyń synaǵy Birikken Arab Ámirlikterinde de ótedi. Oǵan 15 myńǵa jýyq adam qatysady.
Vaktsina eki jylǵa deiin áser etedi delingen. Qazir Qytaida bul vaktsinany 50 myńnan astam adam saldyrǵan. Shildede Beijińde vaktsina shyǵaratyn ekinshi zaýyttyń qurylysy aiaqtaldy. Alǵashqy zaýyt Ýhan qalasynda salynǵan. Endi Qytai jylyna vaktsinanyń 200 million danasyn shyǵara alady.
