Almatynyń qylmystyq ister jónindegi mamandandyrylǵan aýdanaralyq soty elimizdiń tuńǵysh prezidentiniń jieni Qairat Satybaldynyń burynǵy zaiyby Gúlmira Satybaldynyń isi boiynsha barlyq materialdardy qarady, dep habarlaidy Dalanews.kz Ulysmedia.kz-ke siltep.
Endi kelesi aptada sottalýshylardan jaýap alynýy múmkin.
Keshe sotta Gúlmira Satybaldy men onyń burynǵy kólik júrgizýshisi Mádi Batyrshaevtan zábir kórip, zańsyz bas bostandyǵynan aiyrylǵan jábirlenýshi Abai Júnistovtiń jaǵdaiyna qatysty psiholog Sáýle Izbasarovanyń jaýaby tyńdaldy. Ol sarapshylarmen birge jábirlenýshiniń jaǵdaiyn baqylaǵanyn aityp berdi.
Psiholog jábirlenýshiniń sottalýshylarlan zábir kórgenine senetinin, onyń sózinde eshqandai ótirikti baiqamaǵanyn aitty.
"Abai Júnisov maǵan basynan ótken jaǵdaiǵa bailanysty myna nárseni baiandady. Ol sol qiyn kezde óz-ózine qol jumsaǵysy kelgen eken. Sodan keiin ólim týraly oilaǵysy kelmei, namazǵa jyǵylǵysy kelgen. Onyń bireýden qorqyp, óz-ózine qol jumsaǵysy kelgenin, sosyn bul oiynan ainyp qalǵanyn qorqaqtyq dep oilamaimyn. Meniń oiymsha, ol otbasynyń aldyndaǵy jaýapkershilikti sezgennen kein óz-ózine qol jumsaǵysy kelmegen", - dedi ol.
Sotta sarapshylar jábirlenýshimen sóileskennen keiin onyń psihologiialyq jaǵdaiy qiyn ekenin eskertti.
"Abai Júnistovtiń jaǵdaiy óte qiyn. Ol osynshama ýaqyt eshkimmen aralaspai, qoǵamnan oqshaýlandy. Sondyqtan oǵan psihologiialyq kómek kerek", - dedi ekspertter.
Sotta Gúlmira Satybaldynyń alys týysy suraqtarǵa jaýap berdi. Ol sottalýshymen birge 2017-2019 jyldary "Baur Kazakhstan" kompaniiasynda jumys istegenin atap ótti.
Kýáger Satybaldynyń kezinde kompaniia Almaty qalasynda "Vostochka" turǵyn úi kesheniniń qurylysyn salý úshin tenderdi jeńip alǵanyn aitty.
Ol óz sózinde kompaniia tenderdi utyp alǵanda Gúlmira Satybaldyǵa turǵyn úi kesheniniń qurylysyna qatysty kúmándi kelisimder jasalyp jatqanyn aitqanyn jetkizdi.
Sol kezde Anar Jalilova degen esepshi bolǵan. Ol maǵan kompaniianyń esebinen jer ýchaskeleri men avtokólikterdiń satyp alynyp jatqanyn qujatyn kórsetti. Býhgalter osy másnle boiynsha suraq týyndasa, kompaniianyń basshysy Gúlmira Satybaldyǵa habarlas dedi.
"Jer ýchaskesi Qabenovtyń ("Baqyt Qabenov - Baur Kazakhstan" kompaniiasynyń burynǵy direktory, - red.) atyna satyp alyndy. Sodan keiin úi salynyp, qurylys tehnikasy men materialdaryn aldyq. Jumysshylarǵa kompaniianyń esebinen jalaqy tólenip otyrdy", - dedi kýáger.
Sotta aiyptalýshynyń qorǵaýshysy Ásemgúl Danialova sýdiadan Gúlmira Satybaldynyń týǵan baýyry men Abai Júnistovtyń burynǵy áieli Raia Pirimbetovten, aýditorlyq kompaniianyń qyzmetkeri Abai Álimov pen lombardyń qyzmetkeri Valentina Kazimirovdan jaýap alýdy ótindi.
Sýdia onyń ótinishin qanaǵattandyrdy.
Endi kelesi aptada aiyptalýshy Gúlmira Satybaldy men onyń burynǵy kólik júrgizýshisi Mádi Batyrshaevtyń jaýaby tyńdalady. Olarǵa aǵaiyndy Abai, Altai jáne Qasym Júnisovterdi zańsyz bas bostandyǵynan aiyrý jáne asa iri mólsherde aqsha bopsalaý boiynsha aiyp taǵylyp otyr.
Buǵan deiin Gúlmira Satybaldynyń isi boiynsha figýrant taǵy bir qylmysy úshin sottalǵan bolatyn.
