Elimizde Otbasynyń tsifrlyq kartasyn engizýdiń nátijesinde 2024 jyl bastalǵaly 447,8 myńnan astam adamǵa memlekettik qyzmetterdi proaktivti kórsetý úshin SMS-habarlama joldandy. Bul rette ótinish berýsiz járdemaqy nemese tólem alý múmkindigin 195,6 myń adam paidalandy, dep habarlaidy Dalanews.kz.
Eńbek jáne áleýmettik qorǵaý ministrligi baspasóz qyzmetiniń habarlaýynsha, Otbasynyń tsifrlyq kartasy (OTsK) memlekettik organdardyń qoldanystaǵy barlyq aqparattyq júieleriniń derekteri negizinde qalyptastyrylady. Búginde onda Qazaqstannyń 20 mln azamaty nemese 6 mln-nan astam otbasy týraly aqparat jinaqtalǵan.
Kartany engizýdiń basty maqsaty – qazaqstandyqtardyń memlekettik qoldaý júiesine teń qoljetimdiligin qamtamasyz etý. Osyǵan bailanysty QR Áleýmettik kodeksinde Otbasynyń tsifrlyq kartasy áleýmettik saiasattyń orta jáne uzaq merzimdi mindetteri men baǵyttaryn aiqyndaý quraly retinde belgilengen. Sondai-aq, OTsK azamattardyń áleýmettik mártebesine bailanysty kepildendirilgen memlekettik qoldaýdyń qandai da bir túrin alýǵa quqyqtary týraly kúndelikti "elektrondyq habarlama" bolyp tabylady.
Qazirgi ýaqytta OTsK memlekettik qoldaý sharalaryn alýǵa quqyǵy bar qazaqstandyqtarǵa qandai da bir ótinishtersiz járdemaqylar men áleýmettik tólemderdiń 10 túrin resimdeýge múmkindik beredi. Olar eńbek etý qabiletinen aiyrylǵan jaǵdaida tólenetin áleýmettik tólem; jumysynan aiyrylǵan jaǵdaida tólenetin áleýmettik tólem, asyraýshysynan aiyrylý boiynsha tólenetin áleýmettik tólem nemese járdemaqy, múgedektigi bar balany tárbielep otyrǵan ata-anasyna (qamqorshysyna) járdemaqy, múgedektigi boiynsha járdemaqy, kópbalaly otbasylarǵa beriletin járdemaqy, "Altyn alqa" jáne "Kúmis alqa" alqalarymen marapattalǵan kópbalaly analarǵa beriletin járdemaqy, ataýly áleýmettik kómek, sondai-aq jerleýge arnalǵan birjolǵy tólem.
Sondai-aq, OTsK arqyly zeinetaqy tólemderin alý múmkindigi, "qandas" mártebesi berilgende nemese uzartylǵanda mártebeniń aiaqtalý merzimi jáne jumyssyz adamdar úshin jumyspen qamtý sharalary týraly avtomatty habarlamalar iske asyryldy.
"Memlekettik qoldaý sharalaryn alýǵa quqyq belgilengen kezde áleýetti alýshyǵa 1414 biryńǵai bailanys ortalyǵynan SMS-habarlama jiberiledi. Habarlama alǵan azamat oǵan kelisimi týraly jaýap berýi kerek. Ótinishti resimdeý jáne áleýmettik járdemaqy nemese tólem taǵaiyndaý avtomatty rejimde júrgiziledi, sodan keiin aqsha qarajaty alýshynyń bank shotyna aýdarylady. Alaiaqtyq táýekelin boldyrmaý maqsatynda 1414 biryńǵai bailanys ortalyǵynan kelip túsken SMS-ke jaýap berý qajettigin atap ótemiz", delingen Eńbek ministrliginiń habarlamasynda.
