Otanyna opasyzdyq jasady dep sottalǵan Konstantin Syroejkinge Qasym-Jomart Toqaev raqymshylyq jasady, - dep habarlaidy Dalanews.kz.
Qazaqstan prezidenti Qasym-Jomart Toqaev óz jarlyǵymen belgili qytaitanýshy ǵalym Konstantin Syroejkindi raqymshylyqpen bosatty. Bul týraly saiasattanýshy Andrei Chebotarev habarlady.
"Ótken jazdan beri jaqsy jańalyq! Qazaqstan Respýblikasy Prezidenti janyndaǵy raqymshylyq máseleleri jónindegi komissiianyń usynysy boiynsha Memleket basshysy Qasym-Jomart Toqaev tiisti jarlyqpen belgili qytaitanýshy ǵalymdy, saiasi ǵylymdardyń doktory jáne professor Konstantin Syroejkindi raqymshylyqpen bosatty. Osyǵan bailanysty onyń sottylyǵy joiylyp, quqyqtary qalpyna keltirildi. Jalpy, ádildik ornady! Áriptesimizge jáne ustazymyzǵa myqty densaýlyq pen jańa ǵylymi jetistikter tileimin!" - dep jazdy Chebotarev sársenbide Telegram-arnasynda.
Syroejkinniń sottalǵany týraly aqparat 2019 jyly aldymen áleýmettik jelide jariialanyp, artynsha bul aqpartty Almaty qalalyq soty rastaǵan bolatyn.
"Aqpanda qytaitanýshy, Qytaidy jete biletin maman Konstantin Syroejkin qamaýǵa alynǵan edi. Oǵan "Otanyna opasyzdyq jasady" degen aiyp taǵyldy. Sot protsesi jabyq ótti. Syroejkindi 10 jylǵa bas bostandyǵynan aiyrý, jazasyn arnaiy qatań rejimdegi abaqtyda ótkizý, odan soń azamattyǵynan aiyrý jazasy kesilgeni belgili boldy", - dep jazdy sol kezde qoǵam belsendisi Ǵalym Aqeleýov.
Onyń aitýynsha, Syroejkin kinásin moiyndamaǵan jáne apelliatsiialyq shaǵym berýden bas tartqan. Keiinirek bul jaitqa qatysty Ulttyq qaýipsizdik komiteti de málimdeme jasady.
"2019 jyly 7 qazanda Almaty qalasynyń qylmystyq ister jónindegi mamandandyrylǵan aýdanaralyq soty 1956 jyly týylǵan QR azamaty Konstantin Lvovich Syroejkindi QR Qylmystyq kodeksiniń 175-baby 1-bóligi, iaǵni "Otanǵa opasyzdyq jasaý" boiynsha kináli dep taýyp, ony 10 jylǵa bas bostandyǵynan aiyrdy", - dedi QR UQK baspasóz qyzmeti ókilderi.
Sot úkimi shyqqan kezde Syroejkin bostandyqqa shyqqannan keiin Qazaqstannan qýylyp, bes jylǵa deiin elge oralýyna tyiym salynatyny týraly da aqparat tarady.
