Qurban ait merekesi ait namazynyń oqylýymen bastalady. Shyǵys Qazaqstan oblysy boiynsha oblystyq, qalalyq, aýdandyq jáne aýyldyq meshitterde ait namazy 28 maýsym kúni tańǵy saǵat 7.00-de oqylady.
28 maýsym saǵat 07.30-dan bastap Shyǵys Qazaqstan oblystyq «Halifa Altai» meshitiniń aldynda merekelik rýhani-mádeni baǵdarlamasy júriledi, mádeni-sporttyq básekeler uiymdastyrylady.
Óskemen qalalyq ákimdiktiń kelisimimen "Shyǵys" aýylynda qurban shalý orny ashyldy. Qurbandyqty 28 maýsym saǵat 07.30-dan bastap shalýǵa bolady. Mal soiatyn qasapshylar «Halifa Altai» meshitindegi oqytý ortalyǵynda arnaiy qasapshylardy oqytý kýrsynan ótken jáne arnaiy jeletkamen qamtamasyz etilgen.
Qurbandyqtyń etteri turmysy tómen otbasylarǵa, áleýmettik ortalyqtarǵa 28, 29, 30 maýsym kúnderi «Halifa Altai» meshitinde úilestiriledi. Bul jumystar úshin de «Halifa Altai» meshitiniń oqytý ortalyǵynda qurban aitta qyzmet kórsetetin eriktilerdi arnaiy oqytty.
Sonymen qatar, mal satatyn azamattarmen baǵany retteý boiynsha túsindirme jumystaryn júrgizdi.
Aita ketý kerek, qurbandyqqa qoi, eshki, siyr jáne túie maldaryn ǵana shalýǵa bolady. Qurban retinde shalynatyn qoi jáne eshki kem degende bir jasar, siyr eki jasar, túie bes jasar bolýy kerek. Alty-jeti ailyq kepe qozy bir jasar qoi siiaqty semiz, etti bolsa, qurbandyqqa shalýǵa jaraidy. Qoi men eshkiniń erkegin, siyrdyń urǵashysyn shalý abzal.
Qoi nemese eshkini tek bir adam qurban retinde shala alady. Al siyr nemese túieni iaǵni, iri qarany bir kisiniń jalǵyz ózi úshin shalýyna bolatyn siiaqty jeti kisige arnap, ortaq shalýlaryna bolady. Qurbandy ortaqtasyp shalǵan ýaqytta árbir adam qurban shalý nietimen ortaqtasýy kerek. Bir kisi qurban úshin, al ekinshi bir kisi tek qana etin alý nietimen ortaqtassa, shalynǵan mal barlyq ortaqtar úshin qurban bolyp eseptelmeidi.
Osy oraida Qazaqstan musylmandary dini basqarmasynyń Shyǵys Qazaqstan oblysy boiynsha bas imamy, oblystyq «Halifa Altai» meshitiniń bas imamy Ermek qajy Qasbolatuly barsha shyǵysqazaqstandyqtardy Qurban ait merekesimen quttyqtaidy.
– Búginde álem musylmandary úlken qajylyq jasaýda. Solardyń qatarynda Mekke qalasynda qajylyq paryzyn ótep júrgen shyǵysqazaqstandyq jerlesterimizben barlyq otandasymyzdyń nieti men duǵasy qabyl bolyp, elimizge aman-esen oralýyn tileimiz. Alla Taǵala elimiz ben jerimizge berekesin berip, shalǵan qurbandyqtarymyzdy, bergen sadaqalarymyzdy, izgi amaldarymyzdy qabyl etkei. Aittan aitqa aman-esen jete bereiik. Ámin, – dedi bas imam.
Sonymen qatar, ol oblysymyzdaǵy barsha kásipker azamattardy Qurban aittyń qurmetine mal qunyn qoldan kótermei, halyqtyń áleýmettik jaǵdaiyn eskerip, ońtaily baǵa usynýǵa, jurt kúnde tutynatyn azyq-túlikke múmkindiginshe jeńildik jasaýǵa shaqyrdy.
«Qurban aittyń negizgi máni musylmandar arasynda ózara meiirimdilik, jomarttyq, qaiyrymdylyq, qanaǵat syndy adamgershilik qundylyqtardy qalyptastyrý ekenin esten shyǵarmaǵan abzal. Allanyń raqym nury tógiletin aitta jurtymyzǵa jaqsylyq jasap, kópshiliktiń rizashylyǵyna bóleneiik. Alla Taǵala izgi nietimizdi qabyl etsin!», - dedi Ermek qajy Qasbolatuly.
