Óskemen qalasynyń soty Shyǵys Qazaqstan oblysy ortalyǵy áýejaiyn shamamen 20 jyl basqarǵan Nikolai Korolenkoǵa qatysty úkim shyǵardy, dep habarlaidy Dalanews.kz.
Sot ony senip tapsyrylǵan múlikti iemdený nemese ysyrap etý jáne qyzmettik ókilettigin asyra paidalaný baptary boiynsha kináli dep tanyp, segiz jylǵa bas bostandyǵynan aiyrdy. Sonymen qatar Korolenkoǵa memlekettik jáne kvazimemlekettik sektorda ómir boiy qyzmet atqarýǵa tyiym salyndy. Ol sot zalynda qamaýǵa alyndy.
Jaza ortasha qaýipsizdik deńgeiindegi mekemede óteledi. Úiqamaqta otyrǵan merzimi «eki kún bir kúnge» formýlasy boiynsha esepteldi.
Is boiynsha taǵy bir figýrant Aliona Stýdenkova jeti jylǵa bas bostandyǵynan aiyryldy, alaida jazanyń oryndalýy keiinge shegerildi. Oǵan da basshylyq qyzmet atqarýǵa tyiym salyndy. Al Aleksei Stýdenkovke qatysty jaza amnistiia men esepke alynǵan merzimderdi eskere otyryp, ótelgen dep tanyldy.
Sot azamattyq talaptardy ishinara qanaǵattandyryp, figýranttardan ortaq jáne jeke tártipte 140 mln teńgeden astam zalaldy jáne memlekettik bajdy óndirý týraly sheshim qabyldady. Qarajatty úkim zańdy kúshine engennen keiin eki ai ishinde erikti túrde óteý kózdelgen.
Sonymen qatar sot korporativtik jáne qarjylyq baqylaýdaǵy júieli buzýshylyqtardy, sondai-aq aviatsiialyq qaýipsizdik talaptarynyń saqtalmaǵanyn atap ótip, aerodrom aýmaǵyna kólikterdiń baqylaýsyz kirý faktilerin kórsetti. Osyǵan bailanysty materialdar oblys ákimine joldandy.
Úkimge jariialanǵan kúnnen bastap 15 táýlik ishinde apelliatsiialyq tártippen shaǵym túsirýge bolady.
Tergeý jalpy keltirilgen shyǵyndy 157 mln teńge dep baǵalap, tólemderdi negizsiz ósirý, jalǵan kelisimsharttar men aktivterdi shyǵarý faktilerin anyqtaǵan. Kúdiktilerdiń múlkine buǵat salynǵan.
