وسكەمەن قالاسىنىڭ سوتى شىعىس قازاقستان وبلىسى ورتالىعى اۋەجايىن شامامەن 20 جىل باسقارعان نيكولاي كورولەنكوعا قاتىستى ۇكىم شىعاردى، دەپ حابارلايدى Dalanews.kz.
سوت ونى سەنىپ تاپسىرىلعان مۇلىكتى يەمدەنۋ نەمەسە ىسىراپ ەتۋ جانە قىزمەتتىك وكىلەتتىگىن اسىرا پايدالانۋ باپتارى بويىنشا كىنالى دەپ تانىپ، سەگىز جىلعا باس بوستاندىعىنان ايىردى. سونىمەن قاتار كورولەنكوعا مەملەكەتتىك جانە كۆازيمەملەكەتتىك سەكتوردا ءومىر بويى قىزمەت اتقارۋعا تىيىم سالىندى. ول سوت زالىندا قاماۋعا الىندى.
جازا ورتاشا قاۋىپسىزدىك دەڭگەيىندەگى مەكەمەدە وتەلەدى. ءۇيقاماقتا وتىرعان مەرزىمى «ەكى كۇن ءبىر كۇنگە» فورمۋلاسى بويىنشا ەسەپتەلدى.
ءىس بويىنشا تاعى ءبىر فيگۋرانت ءالونا ستۋدەنكوۆا جەتى جىلعا باس بوستاندىعىنان ايىرىلدى، الايدا جازانىڭ ورىندالۋى كەيىنگە شەگەرىلدى. وعان دا باسشىلىق قىزمەت اتقارۋعا تىيىم سالىندى. ال الەكسەي ستۋدەنكوۆكە قاتىستى جازا امنيستيا مەن ەسەپكە الىنعان مەرزىمدەردى ەسكەرە وتىرىپ، وتەلگەن دەپ تانىلدى.
سوت ازاماتتىق تالاپتاردى ءىشىنارا قاناعاتتاندىرىپ، فيگۋرانتتاردان ورتاق جانە جەكە تارتىپتە 140 ملن تەڭگەدەن استام زالالدى جانە مەملەكەتتىك باجدى ءوندىرۋ تۋرالى شەشىم قابىلدادى. قاراجاتتى ۇكىم زاڭدى كۇشىنە ەنگەننەن كەيىن ەكى اي ىشىندە ەرىكتى تۇردە وتەۋ كوزدەلگەن.
سونىمەن قاتار سوت كورپوراتيۆتىك جانە قارجىلىق باقىلاۋداعى جۇيەلى بۇزۋشىلىقتاردى، سونداي-اق اۆياسيالىق قاۋىپسىزدىك تالاپتارىنىڭ ساقتالماعانىن اتاپ ءوتىپ، اەرودروم اۋماعىنا كولىكتەردىڭ باقىلاۋسىز كىرۋ فاكتىلەرىن كورسەتتى. وسىعان بايلانىستى ماتەريالدار وبلىس اكىمىنە جولداندى.
ۇكىمگە جاريالانعان كۇننەن باستاپ 15 تاۋلىك ىشىندە اپەللياسيالىق تارتىپپەن شاعىم تۇسىرۋگە بولادى.
تەرگەۋ جالپى كەلتىرىلگەن شىعىندى 157 ملن تەڭگە دەپ باعالاپ، تولەمدەردى نەگىزسىز ءوسىرۋ، جالعان كەلىسىمشارتتار مەن اكتيۆتەردى شىعارۋ فاكتىلەرىن انىقتاعان. كۇدىكتىلەردىڭ مۇلكىنە بۇعات سالىنعان.
