Qazaqstannyń eńbek sińirgen jattyqtyrýshysy Tursynǵali Edilov Dalanews.kz-ke bergen suhbatynda álem chempionatynda qazaqstandyq boksshylardyń óner kórsetýine qatysty pikir bildirdi.
Tursynǵali Edilov finalda boksshylarymyz erik-jigeri men myqty minez kórsetkenin atap ótti.
«Bul bapkerlerdiń, sport komitetiniń eńbegi. Jattyqtyrýshylar quramy óz jumysyn jaqsy alyp shyqty. Sebebi daiyndyq myqty. Psihologiialyq turǵydan da myqty daiyndyq boldy. Oiynnyń ózi de tartysty ótti. Qazaq boksshylary myqty ekenderin dáleldedi. Bizde boks bolǵan, bola beredi de. Keshe osyǵan kýá boldyq», - deidi Tursynǵali Edilov.
Ol boksshylar osy qarqynmen Olimpiada oiyndarynda da tartysty oiyn kórsetedi deidi.
«Sebebi jas boksshylar bar. Olar naǵyz tájiribe jinap, Olimpiada da jaqsy oiyn kórsete alady dep oilaimyn. Qyzdardyń da deńgeii jaqsy. Endi osy qurammen Olimpiadaǵa daiyndalý kerek», - deidi jattyqtyrýshy.
Sonymen qatar, Tursynǵali Edilov Nazym Qyzaibaiǵa altyn alýǵa ne kedergi bolýy múmkin ekenin aitty.
«Nazym birinshi shyqqan soń qobaljyp qaldy ma dep oilaimyn. Biraq ol jaqsy óner kórsetti. Finalǵa deiin jetti. Ishtei qalai bolar eken dep kóp oilanǵan shyǵar. Ishtei qysym da bolǵan shyǵar. Al jalpy finalǵa deiin jaqsy óner kórsetti», - deidi Tursynǵali Edilov.
Eske salaiyq, bokstan Qazaqstan ulttyq quramasy álem chempionatynyń jalpykomandalyq esebinde jeńiske jetti.
Qazaqstan quramasy álem chempionatyn jeti altyn medalmen aiaqtady. Birinshi oryn ielengender: Alýa Balqybekova (51 kelige deiin), Sanjar Táshkenbai (50 kelige deiin), Mahmud Sabyrhan (55 kelige deiin), Aida Ábikeeva (65 kelige deiin), Natalia Bogdanova (70 kelige deiin), Tórehan Sabyrhan (70 kelige deiin).
Nazym Qyzaibai (48 kelige deiin) kúmis júldeger atandy. Viktoriia Grafeeva (60 kelige deiin) men Eldana Tálipova (80 keliden joǵary) qola júldemen erekshelendi.
