Búgin túnde elorda turǵyndaryn alańdatqan tótenshe jaǵdai oryn aldy. Saǵat túngi 4 shamasynda Astananyń sol jaǵalaýyndaǵy kópqabatty turǵyn úidiń birinshi qabatynda ornalasqan "Karima" dámhanasynda órt shyqty, dep habarlaidy Dalanews.kz.
Oqiǵa orny- Dostyq pen Aqmeshit kósheleriniń qiylysyndaǵy segiz qabatty turǵyn úi. Kýágerlerdiń aitýynsha, aldymen qatty tarsyl estilip, artynsha qoiý tútin men jalyn dámhanadan kókke kóterilgen. Órt áp-sátte keń aýmaqty sharpyp, búkil úige qaýip tóndirgen.
Oqiǵa ornyna jedel jetken órt sóndirýshiler qyzyl jalynmen kúresti dereý bastap, úi turǵyndaryn qaýipsiz jerge evakýatsiialady. Abyroi bolǵanda, adam shyǵyny joq.
Qazirgi tańda, órttiń shyǵý sebepteri anyqtalýda jáne de arnaiy espertiza jumystary júrgizilýde. Qalalyq ákimdik pen jaýapty organdar oqiǵa saldaryn joiý jumystaryn júrgizip jatyr.
Oqiǵa kezinde zardap shekken turǵyndardyń biri Dalanews.kz tilshisine sol túngi sátterdi eske alyp, óz áserimen bólisti.
"Bári aiaq astynan boldy. Tún ortasynda syrttan tarsyl estildi. Terezeden qarasam, tómennen qoiý tútin shyǵyp jatyr eken. Balalarym shoshyp oiandy. Qatty qorqyp qaldyq. Áiteýir, qutqarýshylar der kezinde kelip, bizdi syrtqa alyp shyqty",- deidi ol.
Qazirgi ýaqytta órttiń naqty shyǵý sebebi anyqtalyp jatyr. Bul baǵytta mamandar tehnikalyq saraptama júrgizip jatyr. Qalalyq tótenshe jaǵdailar departamenti bul oqiǵa boiynsha tergeý bastalǵanyn málimdedi.
Qazaqstan Respýblikasy Tótenshe jaǵdailar ministrligi azamattarǵa órt kezinde durys áreket etý joldaryn aldyn ala bilip júrýdi usynady. Sebebi, dál sizdiń baisaldy jáne jyldam sheshimińiz óz ómirińizdi ǵana emes, ózgelerdi de aman alyp qalýy múmkin.
Órt kezinde qalai áreket etý kerek?
Órt- bul árdaiym kútpegen ári qaýipti jaǵdai. Mundai sátte adam úreige boi aldyryp, ne isteý keregin umytyp qalýy múmkin. Tipti bala kezden jadymyzda saqtalyp qalǵan- «112 nómirine qońyraý shalyńyz» degen qarapaiym keńestiń ózi sol sátte esimizden shyǵyp ketýi yqtimal.
Tómende órt shyqqan jaǵdaida este ustaýǵa tiis qarapaiym, biraq óte mańyzdy keńester usynylady.
- Órttiń alǵashqy belgilerin baiqasańyz nemese tútinniń iisin sezseńiz:
Birden 112 nómirine habarlasyńyz;
- Elektr qýatyn sóndirip, gazdy óshirińiz.
- Aldymen balalar men qart adamdardyń qaýipsizdigin qamtamasyz etińiz.
Olardy órt oshaǵynan alysqa shyǵaryńyz;
Óitkeni gaz ballondary jarylýy nemese ot tez taralýy múmkin.
- Terezelerdi ashpańyz.
Ashylǵan terezeden keletin ottegi ottyń kúsheiýine sebep bolady.
- Jalyn bir bólmede bolsa- esikti myqtap jabyńyz.
Bul ottyń basqa bólmelerge taralýyn tejeidi;
Esiktiń sańylaýyn dymqyl shúberekpen bekitińiz- tútin kirmeidi.
- Tútin basqan bólmede eńkeiip nemese eńbektep qozǵalyńyz.
Óitkeni tútin men ystyq aýa joǵary kóteriledi;
Tynys joldaryn matamen, múmkindiginshe dymqyl shúberekpen jabyńyz.
- Eger jalynnyń ishinen ótý qajet bolsa:
Sýǵa túsip alyńyz nemese ústińizge dymqyl kórpe jabyńyz;
Demińizdi ishke tartyp, jyldam júgirip ótińiz.
- Eger syrtqa óz betińshe shyǵa almasańyz:
Balkonǵa nemese tereze aldyna shyǵyńyz- bul jerlerden qutqarýshylar sizdi tez tabady;
Aq mata, kórpe nemese kózge túsetin basqa da zat ilip, ózińizdiń qaida ekenińizdi bildirińiz.
Eń bastysy – sabyr saqtańyz!
Panika- basty jaý. Órt kezinde ár sekýnd mańyzdy. Qarapaiym erejelerdi este saqtap, olardy aldyn ala jaqyndaryńyzǵa úiretińiz.
