Májiliske qarasty memlekettik mekemeniń áleýmettik jelide jarıalaǵan habarlandyrýy kópshiliktiń synyna ushyrap, qoǵamda úlken rezonans týdyrdy, dep habarlaıdy Dalanews.kz.

Májilis janyndaǵy medıa-top Instagram paraqshasynda SMM mamandaryna arnalǵan bos jumys orny týraly habarlandyrý jarıalaǵan. Onda orys tilinde saýatty jazý – úmitkerge qoıylatyn mindetti talaptardyń biri retinde kórsetilgen. Al "qazaq tilin bilý" tek qosymsha artyqshylyq retinde atalǵan.

Bul jaıt qoǵamda memlekettik mekemelerdiń qazaq tiline nemquraıly qaraıtyny týraly pikirlerdiń kóbeıýine sebep boldy. Jýrnalıs Jalǵas Ertaı da atalǵan máselege nazar aýdaryp, bılikti qatań synǵa aldy.

"Qazaqstan bıligi óz memlekettik tilin ózi kemsitýmen júıeli túrde aınalysady. Májiliske smm-mamany bolyp turý úshin "ısklúchıtelno" oryssha jaqsy jazýy kerek eken, al qazaqshany bilse de, bilmese de meıli eken",  – dep jazdy ol.

Eske salaıyq, Prezıdent Qasym-Jomart Toqaev 2021 jyly qazaqstandyqtarǵa joldaýynda "Ata Zań boıynsha Qazaqstanda qazaq tili ǵana memlekettik til" ekenin jetkizgen edi.

"Qazaq tilin damytý memlekettik saıasattyń basym baǵytynyń biri bolyp qala beredi. Bul salada aıtarlyqtaı nátıje bar. Qazaq tili, shyn máninde, bilim men ǵylymnyń, mádenıet pen is júrgizýdiń tiline aınalýda. Jalpy, memlekettik tildi qoldaný aıasy keńeıip keledi.

Bul – zańdy qubylys, ómirdiń basty úrdisi. Sondyqtan, qazaq tiliniń órisi tym shektelip bara jatyr deýge negiz joq. Ata Zań boıynsha Qazaqstanda bir ǵana memlekettik til bar. Bul – qazaq tili", - degen edi Memleket basshysy.