Bobrov ótken aptada TASS aqparat agenttigine bergen suhbatynda Qazaqstandaǵy orystildi synyptardyń azaiǵanyn aityp, Qazaqstan oqý-aǵartý ministrligin aiyptai sóilegen.
Bas konsýl sol suhbatynda «orys tildi mektepter men synyptar sany qysqarǵanyn, qazaq tilinde oqytatyn birinshi synyp oqýshylaryna arnalǵan baǵdarlamadan «orys tili» pániniń alynyp tastalýy, pedagogikalyq institýttardyń orys tilinde mamandar daiarlaýmen ainalysatyn fakýltetteriniń qysqarýy kadrlyq resýrstardyń shektelýine ákelgenin aita kelip, bul qubylystyń obektivti sebepteri orys halqynyń Qazaqstanda 15,2%-ǵa deiin azaiǵanynan» dep túsindirgen.
Onyń bul sózi Qazaqstan qoǵamynda qarsylyq týdyrdy.
Smadiiarov jýrnalisterdiń "Bobrov qyzmetin aiaqtap ketip bara jatyp, osy sózdi aityp ketti me?" degen suraǵyna jaýap bermedi, Bobrovtyń sózi "durys emes" dedi.
"Ol (Evgenii Bobrov – avt.) aqparatty bilmeitin shyǵar. Almatyda bolǵan soń tek shekteýli aqparatqa súiengen bolar. Biraq 26 tamyzdan beri ol Qazaqstanda jumys istemeidi. Qazir Evgenii Bobrov Reseidiń Almatydaǵy bas konsýly emes", - dedi ol SIM-de ótken baspasóz máslihatynda.
Aibek Smadiiarovtyń aitýynsha, Qazaqstanda orys tiliniń aiasy tarylmaǵan.
«Oqý-aǵartý ministrliginiń málimetinshe, qazir Qazaqstanda memlekettik 7 711 mektep bar. Tek qazaq tilinde bilim beretin – 3957 mektep, orys tilinde bilim beretin – 1203, al aralas mektep sany – 2 551.
Osy derekke súiensek – joǵary kórsetkish. Alaida ýaqyt talabyna sai qazir qazaqsha bilim beretin mektepterdiń sany artyp jatyr», - dedi resmi ókil.
Keiingi ýaqytta Reseide Qazaqstandaǵy ultaralyq qatynastar jáne orys halqynyń jaǵdaiy týraly ártúrli deńgeidegi talqylaýlar kúsheigen.
Reseilik saiasatkerler men propaganda jýrnalisteri ara-tura "Qazaqstanda orys tiline qysym jasalyp jatyr" dep birneshe ret málimdeme jasaǵan. Reseilik saiasatkerler Qazaqstandaǵy qazaq tildi belsendilerdiń áreketin jáne tilge qatysty zańdardy jii synǵa da alǵan.
Qazaqstan prezidenti Qasym-Jomart Toqaev byltyr 7 qazanda Sankt-Peterbýrgte TMD elderi basshylarynyń beiresmi sammitinde TMD janynan orys tilin qoldaý jáne damytý boiynsha halyqaralyq uiym qurýdy usynǵan. Usynysty Resei basshysy Vladimir Pýtin qoldaǵan edi.
