Orys bapkeri Levittiń jeńiske jetkenin moiyndady
– Endi, ne aitýǵa bolady, bul jekpe-jekte kimniń jeńgenin bári kórdi! Men ózim ádil tóreshilikti qalaimyn. Sondyqtan bapkerler men sportshylardyń eńbegi tiisti deńgeide baǵalanýy qajet dep sanaimyn! Biz, bapkerler, «stanoktyń» qasynda turǵan adambyz ǵoi. Sol sebepti Vitalii men onyń bapkerlerine, jalpy búkil boks boiynsha «áttegen-aidan» basqa eshteńe aita almaimyz! Óitkeni ring ainalasynda bolyp jatqan mundai jaǵdailar bizdiń sportymyzǵa abyroi ákelmeidi. Ókinishke qarai, bul Olimpiadada bolǵan jalǵyz jekpe-jek emes. Ony bir rettik oqiǵa emes, úderis dep ataý qajet. Árine, bizdiń boksshymyz da ringke jeńiske jetý úshin shyqty. Sonyń qolyn kóterse, boksshynyń kinási joq. Endi, qaitemiz, bergenin aldyq...– dedi Kravtsov.
Al tanymal reseilik promoýter Vladimir Hriýnov qazaqstandyq boksshy Vitalii Levittiń sheberligin joǵary baǵalap, oǵan Vel Barker atyndaǵy kýbokty berý kerek dep sanaidy. Mamannyń sózine qaraǵanda, Levit kásibi boksqa aýysýǵa tolyǵymen daiyn.
Aita keteiik, Rio-de-Janeiroda ótip jatqan XXXI Olimpiada oiyndarynda bokstan 91 kelige deiingi salmaqta óner kórsetken Vasilii Levit finalda reseilik Evgenii Tishenkodan utylyp qaldy. Jekpe-jekke baǵa bergen úsh tóreshiniń bári de Tishenkonyń jeńisine kúmán keltirgen joq. Alaida referi E.Tishenkonyń qolyn kótergende zalda jinalǵan jankúierlerdiń bári ysqyryp, tóreshilerdiń sheshimine óz narazylyqtaryn bildirdi. Levittiń ózi jeńisine senimdi boldy. Alaida tóreshiler basqasha sheshti. Sodan bolar, saltanatty marapattaý rásiminen keiin Levit kúmis medalin birden qaltasyna salyp aldy.
Arman ASQAROV
