Májilis depýtaty Baqytjan Bazarbek zańsyz berilgen jerlerdiń máselesin kóterip, buǵan Eski Qazaqstannyń ókilderiniń qandai qatysy bar ekenin aitty, - dep habarlaidy Dalanews.kz.
Onyń sózinshe, Almatydaǵy Bostandyq aýdanynda Eski Qazaqstan ókilderine tiesili Halyq bank, Qusa-halyq ieliginde bolǵan ózenniń sý qorǵaý aýmaǵyna kiretin kólemi 52 gektar jer ýchaskesi sottyń zańdy kúshine engen sheshimi boiynsha memlekettik menshikke qaitarylǵan. Alaida bul tek qujat júzinde qaitarylypty.
"Is júzinde jer qaitarylsa da qurylys jumystardy eshkim toqtata almai jatyr. Burynǵy ieleri sý qorǵaý aimaǵyn ózen arnasymen birge topyraqpen tegistep, kóp qabatty turǵyn úidi kóterýge jan jaqty jumys júrgizilip jatyr. Ony men Almaty qalasy Jer inspektorlarymen birge óz kózimmen kórdim", - deidi depýtat.
Sondai-aq, ol ataqty Rahat bazaryna qatysty máseleni kóterdi.
"200-ge jýyq saýdagerleriniń jer daýyn alyńyz, 2022 jyly Almaty qalalyq soty kezinde Baýyrjan Baibektiń 3 jyldan keiin zańsyz qaýlysyn buzyp jeńiske jetse daǵy, saýdagerler bazar jerin áli de daýlap ala almai júr", - deidi depýtat.
Baqytjan Bazarbek Shymkentte zańsyz SPK "Shymkent"-ke berilgen aýmaǵy 77 gektar bolatyn 46 jer telimin jergilikti Jer inspektorlary sotqa berip, zańsyz shyǵarylǵan ákimderdiń qaýlylary men jalǵa alý sharttaryn buzǵanyn aitady. Alaida ákimdik bul iste saiabyrsyp otyr eken.
"Endi sottyń sheshimin oryndaý aiasynda memlekettik menshikke qaitarýǵa kelgende Shymkent qalasynyń ákimdigi atalǵan jerlerdi memlekettik balansqa áli qabyldamady?! Inspektorlar jerdi memlekettik menshikke qabyldaý boiynsha jáne sottyń sheshimin oryndaý qajettigi týraly birneshe resmi eskertti. Biraq Shymkent qalasynyń ákimdigi áreketsizdik tanytyp otyr! Muny qalai túsinýge bolady?" - deidi ol.
Depýtat "Shyǵys Montaj Stroi" mekemesine tiesili jer memlekettik menshikke sottyń sheshimimen qaitsa da, dál sol jerde jańa "Uly dala" turǵyn-úi kesheni qurylysy bastalyp ketkenin málimdedi.
"Bul turǵyn-úi keshenin soǵýdy toqtatyńdar degen sottyń sheshimi shyqty, zańdy kúshine endi, biraq ta sottyń sheshimin oryndatýǵa memlekettik organdardyń tisi batpai otyr", - deidi Bazarbek.
Mundai jaǵdai Astanada da baiqalǵan. Depýtattyń aitýynsha, "Dýblin", "Sensata bild" jáne "Vashington" turǵyn úi keshenderi qurylys júrgizý ruqsat qujattarynsyz ǵana emes, tipti jerge tiisti quqyqty almai zańsyz qurylysyn bastap ketken.
"Sonda elimizdiń 3 iri negizgi qalalardyń GASK salasyndaǵy ýákiletti organdary, qala prokýratýralary, ádilet departamentteri men KDS-i bar, shyǵarylǵan sot sheshimderin oryndatýǵa, mindetteýge qaýqarsyz bolǵany ma, shamalary jetpedi me? Prezident aitqandai, zań talaptary qalai oryndaimyz?!
Sottyń sheshimin oryndamaý - Eski Qazaqstannyń shynaiy kórinisi, qoǵamdaǵy ádildik pen quqyqtyq aqiqatqa balta shabý dep esepteimin", - dedi ol.
