Túrkistan oblysy Ordabasy aýdandyq sotynda pedagogtiń ózine qol jumsaýǵa árekettengeni týraly aqparat tarady, dep habarlaidy dalanews.kz.
Áleýmettik jelide jariialanǵan málimetke sáikes, oqiǵa 3 maýsym kúni aýdandyq sot ǵimaratynda bolǵan.
Jazba avtorynyń aitýynsha, 24 jyldyq eńbek ótili bar ustaz H. Erimbetov biyl qańtar aiynda mektep ákimshiliginiń sheshimimen jumystan bosatylǵan.
Avtordyń málimetinshe, pedagog jumystan zańsyz shyǵarylǵanyn aityp, Túrkistan oblysynyń eńbek inspektsiiasyna shaǵym túsirgen. Tekserý qorytyndysynda inspektsiia mektep basshylyǵyna qyzmetkerdi jumysqa qaita ornalastyrý jóninde eki márte nusqama bergenimen, onyń oryndalmaǵany kórsetilgen.
Osydan keiin muǵalim sotqa júgingen. Alaida, jazba avtorynyń aitýynsha, eńbek daýyna qatysty is bes aiǵa jýyq ýaqyt boiy túpkilikti sheshilmei kelgen.
"Alty balanyń ákesi bes aiǵa jýyq jumyssyz júrip kúizeliske túsken. Qolynda Túrkistan oblystyq eńbek inspektsiiasynyń jumysqa qaita ornalastyrý týraly nusqamasy bola tura, aýdandyq sotta ádildik izdep júrgen azamattyń jaǵdaiy osyndai deńgeige jetti", – dep jazdy Safýan Jolai.
Sondai-aq onyń málimetinshe, 28 mamyr kúni H. Erimbetov sot otyrysy kezinde sýdiaǵa qarsylyq bildirip, sot zalynan shyǵyp ketken.
Keiin oǵan sotqa baǵynbaý deregi boiynsha ákimshilik is qozǵalyp, bes táýlikke qamaýǵa alý týraly sheshim shyǵarylǵan.
"Bes ai boiy jumyssyz, kúizelis jaǵdaiynda júrgen azamattyń bes táýlikke qamalý týraly úkimnen keiin ózine qol jumsaýǵa deiin barýy – alańdatarlyq jaǵdai. Qazirgi tańda ol Ordabasy aýdandyq ortalyq aýrýhanasynda jatyr", – deidi jazba avtory.
Sonymen qatar ol memlekettik organdardy atalǵan iske nazar aýdarýǵa shaqyrdy.
Oqiǵaǵa qatysty resmi organdar ázirge túsinikteme bergen joq.
