Asa qamqor erekshe meiirimdi Allanyń atymen bastaimyn! Barlyq maqtaý Allaǵa tán. Ardaqty Paiǵambarymyz Muhammedke Allanyń salaýaty men sálemi bolsyn!
Qurmetti otandastar!
Sizderdi kúlli musylman balasynyń ulyq merekesi – Oraza aitpen shyn júrekten quttyqtaimyn! Ait qabyl bolsyn, aǵaiyn!
«Ait» sózi – «merekeleý», «hal surasý», «bir-birin qýantý», «qýanyshqa toptalý» degen maǵynalardy bildiredi. Oraza ait meiramynda júrekke meiirim, qýanysh sezimi uialaidy. Osynaý sáýleli sátte barshańyzǵa riiasyz nietpen Allanyń amandyǵy men berekesin tileimin. Jaratqan januialaryńyzǵa jar bolsyn!
Oraza ait – bir ai boiy oraza ustap, yqylaspen jaqsylyq jasaǵan adamnyń qurmetke, marapatqa ie bolatyn sáti. Alla Taǵala: «Men paryz etken orazany pendelerim ótep, aqysyn alýǵa (ait namazyn óteýge) meshitke bet aldy. Olar Men úshin oraza ustady, Meniń pármenimmen aýyz ashty, endi qýanyshqa kenelsin...» deidi. Rabbymyz barshamyzdyń qýanyshymyzdy arttyryp, eki dúniede de mereiimizdi ústem etkei.
Alla Taǵala ustaǵan orazamyzdy, muqtaj jandarǵa úlestirgen zeketimiz ben pitir sadaqamyzdy, bergen aýyzasharymyzdy qabyl etip, mol saýap jazǵai.
Saýaptar eselenip jazylatyn berekeli aida kóńili jabyrqaý jandardyń júregine qýanysh syilaýǵa tyrystyq.
Osy rette Qazaqstan musylmandary dini basqarmasynyń igi bastamasyna ún qosyp, meshitterimizde atqarylǵan izgi is-sharalarǵa, qaiyrymdylyq aktsiialaryna belsendi túrde úles qosqan barsha jomart jandarǵa Allanyń nury jaýsyn deimin. Izgi amaldaryńyzdyń jaqsylyǵy men saýaby arta túsýine tilektespin.
https://youtu.be/H6od76ftzxk
Qadirli jamaǵat!
Oraza ait merekesi qutty bolsyn! Ár shańyraqqa baq pen bereke, birlik pen tatýlyq tileimin. Alla Taǵala barshamyzdy kelesi Ramazanǵa deiin aman-esen jetkizip, mol saýapqa kenelýdi násip etkei.
Halqymyz aman, jurtymyz tynysh, eńseli elimizdiń bolashaǵy jarqyn, Táýelsizdigimiz baiandy bolǵai! Ámin!
Naýryzbai qajy TAǴANULY, Qazaqstan musylmandary dini basqarmasynyń tóraǵasy, Bas múfti
