Oralda aliment tóleýden jaltarǵan ata-analarǵa qatysty qatań sharalar nátijesinde 2025 jyly kámeletke tolmaǵan balalardyń paidasyna 734 mln teńge óndirildi, dep habarlaidy Dala News.
Batys Qazaqstan oblysynyń prokýratýrasy aliment óndirýdi kúsheitý aiasynda boryshkerlerdi anyqtaý, májbúrlep oryndatý jáne qylmystyq jaýapkershilikke tartý tetikterin belsendi qoldanǵan. Nátijesinde sot sheshimderin elemei kelgen ondaǵan adam zań aldynda jaýap berdi.
Prokýratýra málimetinshe, tekserý barysynda aliment tóleýden qasaqana jaltaryp, jumysqa ornalasýdan ádeii bas tartqan boryshkerler anyqtalǵan. Solardyń biri birneshe jyl boiy balasyna bir tiyn da tólemei, qaryzyn 1,7 mln teńgege deiin jetkizgen. Ol kámeletke tolmaǵandar isteri jónindegi mamandandyrylǵan sottyń úkimimen Qylmystyq kodekstiń 139-baby boiynsha kináli dep tanylyp, bir jylǵa bas bostandyǵyn shekteý jazasyna kesildi.
Jalpy alǵanda, aliment tólemegeni úshin alty adam qylmystyq jaýapkershilikke tartylǵan. Budan bólek, sot aktilerin oryndamaǵany úshin Ákimshilik quqyq buzýshylyq týraly kodekstiń 669-baby boiynsha 185 boryshker ákimshilik jaýapqa tartyldy.
Qabyldanǵan sharalar nátijesinde 416 balanyń quqyǵy qorǵalyp, 288 aliment qaryzy bar azamat jumysqa ornalastyrylǵan. Qadaǵalaý organy aliment — «erikti kómek» emes, zańmen bekitilgen mindet ekenin atap ótti.
Prokýratýra aldaǵy ýaqytta da alimentten jaltarǵandarǵa qatysty jazany kúsheitý, balalardyń áleýmettik quqyqtaryn qorǵaý jáne boryshkerlerge «jumsaqtyq bolmaitynyn» naqty ispen kórsetý jumysyn jalǵastyratynyn málimdedi.
