Eki ishektiń birin qatty, birin sál - pál kem bura.
Naǵyz qazaq – qazaq emes, Naǵyz qazaq – Dombyra! – dep kórnekti aqyn, jazýshy Qadyr Myrza Áli jyrlaǵandaı qazaq halqynyń árbir shyǵarmalarynda ózindik tarıhy bar Aq Jaıyq ólkesiniń óner tarıhyn nasıhattaıtyn «Dombyra -ulttyq rýh!» atty mýzeıiniń jańa dáýiri bastalmaq.
Qazaq mýzykasyn zertteýshi kórnekti ǵalym, áıgili kompozıtor Ahmet Jubanov atamyz aıtqandaı, «Qazaqtyń dombyrasynyń árbir pernesinde bizdiń ótken tarıhymyz, árbir pernesinde bizdiń qýanyshymyz ben muńymyz jatyr» dep dál aıtqan.
Osyǵan oraı, búgin Oralda qazaqtyń tarıhyn, dástúrleri men myzǵymas qundylyqtardy nasıhattap, ótken tarıhpen búgingi kúndi baılanystyratyn qundy ǵylymı orta qalyptastyrý maqsatynda BQO tarıhı-ólketaný mýzeıiniń bólimi "Dombyra – ulttyq rýh" mýzeıi ashyldy.
Babalardan qalǵan mura kózderi men tarıhı jádigerleri jınaqtalyp tórt ekspozısıalyq zaldan turatyn mýzeı 1 – Dombyra tarıhy zaly, 2 –Qurmanǵazy Saǵyrbaıuly zaly, 3 – Qurmanǵazy orkestri zaly, 4 – Batys óńiriniń dombyrashylary zaly, mýzeıge kelýshilerge tyń serpin bermek.
Mýzeıdi saltanatty túrde Batys Qazaqstan oblysy ákiminiń orynbasary Baqytjan Narymbetov pen oblysqa tanymal tarıhshy, ólketanýshy, mádenıet salasynyń ardageri Jaısań Aqbaev ashty.
Mýzeı qoryna qobyzshy Yqylas Dúkenulynyń qobyzynyń kóshirmesin resmı túrde D.Nurpeıisova atyndaǵy Qazaq halyq aspaptary akademıalyq orkestriniń solıs-qobyzshysy, ónertaný kandıdaty, QR «Mádenıet salasynyń úzdigi», Yqylas atamyzdyń urpaǵy Aqnar Táttibaıqyzy tabystady.
BQO qoǵamdyq damý basqarmasy
