Aqtaý qalasynyń mamandandyrylǵan ákimshilik quqyq buzýshylyqtar jónindegi soty áleýmettik jelilerde Kaspii tehnologiialar jáne injiniring ýniversitetiniń oqytýshylary týraly jalǵan aqparat taratty dep tanylǵan azamatshaǵa 778 500 teńge kóleminde aiyppul saldy, dep habarlaidy dalanews.kz.
Sottyń málimetinshe, biyl mamyr aiynda áleýmettik jelilerge júrgizilgen monitoring barysynda azamatsha R.-nyń Facebook jáne Instagram paraqshalarynda, sondai-aq WhatsApp chattarynda ýniversitet oqytýshylaryna qatysty jariialanymdar ornalastyrǵany anyqtalǵan.
Is materialdaryna sáikes, jariialanǵan málimetterde oqytýshylardyń ar-namysyna, qadir-qasietine jáne iskerlik bedeline nuqsan keltiretin, shyndyqqa sáikes kelmeitin aqparattar bolǵan.
Osyǵan bailanysty quqyq qorǵaý organdary azamatshaǵa qatysty ákimshilik is qozǵaǵan. Aqtaý qalasynyń mamandandyrylǵan ákimshilik quqyq buzýshylyqtar jónindegi soty ony Ákimshilik quqyq buzýshylyq týraly kodekstiń 73-3-baby 2-bóligi boiynsha kináli dep tanydy.
Sot qaýlysymen azamatshaǵa 180 ailyq eseptik kórsetkish mólsherinde, iaǵni 778 500 teńge kóleminde ákimshilik aiyppul salyndy.
Sot otyrysy barysynda azamatsha R. ózine taǵylǵan aiyppen kelispeitinin jáne kinásin moiyndamaitynyn málimdedi. Sonymen qatar ýniversitet ókili sottan ony ákimshilik jaýapkershilikke tartýdy suraǵan.
Sot túsindirgendei, ÁQBtK-niń 73-3-babynyń 2-bóligi boiynsha jala jabý, iaǵni basqa adamnyń ar-namysy men qadir-qasietine nuqsan keltiretin nemese onyń bedeline ziian keltiretin kórineý jalǵan málimetterdi kópshilik aldynda, buqaralyq aqparat quraldary nemese telekommýnikatsiia jelileri arqyly taratý jaýapkershilikke ákeledi.
Atalǵan bapqa sáikes jeke tulǵalarǵa 180 ailyq eseptik kórsetkish kóleminde aiyppul salý nemese 20 táýlikke deiin ákimshilik qamaýǵa alý qarastyrylǵan. Al laýazymdy tulǵalar úshin 650 ailyq eseptik kórsetkish kóleminde aiyppul nemese 25 táýlikke deiin ákimshilik qamaý jazasy kózdelgen.
Sot qaýlysy ázirge zańdy kúshine engen joq.
