Shara aıasynda shákirtter mýzeı qyzmetkerleri Talǵat Orazov pen Berikbaı Abdrasılovtiń Qoja Ahmet Iasaýı esimimen baılanysty mýzeı qoryndaǵy tarıhı muralar jáne kesene ǵımaratynyń arhıtektýrasy men qurylymy, onda saqtalǵan kundy jádigerler jaıynda leksıasyn tyńdady.
Jyl basynan beri qalanyń barlyq bilim uıalarynda josparǵa sáıkes turaqty túrde uıymdastyrylyp jatqan sharanyń maqsaty – san ǵasyrlyq tarıhy bar, barsha túrki jurty bas ıgen Qoja Ahmet Iasaýı ómiri men ulaǵatty úlgi-ónegesin jas urpaqqa keńinen nasıhattaý, muralar tarıhymen arnaıy tanystyryp, týǵan jer men eldiń qadirine súıispenshilikpen qaraýǵa úles qosý, kesene men onda jerlengen tulǵalardyń máńgilik izin uǵyndyrý.
Osy oraıda mamandardyń maǵlumatyn tyńdap, ańyz-áńgimeler men tarıhı derekterge de qyzyǵa qulaq túrgen oqýshylar kórmege kelgen týyndylardyń syry men qupıasyna úńildi.
Ásirese, keseneniń Qazandaq bólmesiniń esigi jaıly aqparatqa yntyqqan jasóspirimder qaqpany bezendirgen ósimdik tektes oıýlarmen qatar ondaǵy tereń mándi sózderdiń mánin túsindi. Sondaı-aq, Taıqazannyń syrtqy bezendirilýinde de tek qazaqı naqyshtar emes, túrli arab jazýy arqyly Quran aıattary men paıǵambar hadısteri jazylǵandyǵy týraly málimet oqýshylarǵa aıryqsha rýh syılaǵandaı.
– Ǵasyrdan-ǵasyrǵa mura bolyp kele jatqan tól tarıhymyzdyń, máńgilik muramyz ben muratymyzdyń dáleli – qolda bar jádigerlerimiz. Bul bastama ózge de bilim uıalarynda jalǵasyn tabady. Bizdiń keleshegimiz – búgingi urpaq. Kesenege jáne kesene aýmaǵyndaǵy tarıhı oryndar men tulǵalar, tól muralary jaıly maǵlumatty barynsha nasıhattap, jas sanaǵa sińirý tarıhymyzǵa qurmetpen qaraýǵa tárbıeleıtini sózsiz. Oǵan búgin taǵy da kóz jetkizdik. Qaqpa men taıqazan zat túrindegi tarıhı jádigerler emes, qoınaýy qanshama syr men mán-maǵynaǵa toly ekendigin bilip, qyzyqqandaryna erekshe qýandym. Tipti, erteń kesenege arnaıy kelip, jádigerlerdi kózben kórip, tanysýǵa suranyp jatyr. Búgingi bir saǵat ishinde alǵan málimetter aıasynda oqýshylar tól tarıhymyzdyń betterin qyzyǵa paraqtaıtynyna senemin, – dedi mýzeı qyzmetkeri Talǵat Orazov.
Aıta ketsek, "Áziret Sultan" memlekettik tarıhı-mádenı qoryq-mýzeıi qorynda Qoja Ahmet Iasaýı jáne han-sultandar men bı-bolystar jáne olardyń tól muralary, nýmızmatıka men arheologıalyq qazba jumystarynan tabylǵan túrli tarıhı kezeńderdi aıǵaqtaıtyyn 25 myńǵa jýyq jádiger bar. Tarıh tanymdaryn tanystyrý maqsatynda kesene men mektepterde arnaıy kórmeler jıi uıymdastyrylýda.
"Áziret Sultan" memlekettik tarıhı-mádenı qoryq-mýzeıiniń baspasóz qyzmeti
