Jańarý, jasarý bar. Qolmen ustap, aýyzben aityp júretindei is joq. Kúni keshe ǵana Bilim jáne ǵylym vitse-ministri Aslanbek Ámrinniń shetelde bilim alýǵa yqylasy "oianyp", oilamaǵan jerden qyzmetinen ketti.
Neniń belgisi?
Shetelde oqyp, Ulttyq tehnologiialyq damý jónindegi agenttikte jumys istep, ǵylymdy damytý, naqtyraq aitsaq ǵylymdy kommertsiialaýdy moinyna alǵan Aslanbek Ámrin nendei is tyndyrdy degen suraqty tikesinen qoisaq, tas jaryp, taý qoparmaǵany oiǵa oralyp, abdyrap qalasyz.
Onyń tusynda qazaq ǵylymynyń damyp ketkenin kórmedik. Sol sekildi ǵalymdardyń ǵylymi-tehnikalyq jobalary kommertsiialanyp, óndiriske engenin de estimedik.
Bizde laýazymdy tulǵa on jerden bilimdi bolsa da saiasi tulǵa bolmasa túk te tyndyra almaityny aidan anyq.
Bizde ministrler otstavkaǵa keterde vitse-ministrler qyzmetinen qosh aitysatyn ádet qalyptasyp keledi.
Vitse-ministr Aslanbek Ámrinniń qyzmetinen ketýi Saǵadievtyń otstavkasy taiap qalǵandai áser qaldyrady eken...
Bul qandai trend?
Sońǵy ýaqyttary Bilim jáne ǵylym ministrliginde vitse-ministrlerdiń shetelge oqýǵa attanýyna bailanysty qyzmetinen ketetin jańa trend paida boldy.
Ótken jyly Bilim jáne ǵylym ministrliginde orta bilim berý salasyna basshylyq jasaǵan Elmira Sýhanberdieva esimdi vitse-ministr aiaq astynan shetelde oqýǵa ańsary aýyp, AQSh-qa attanǵan.
"Bolashaq" baǵdarlamasynyń túlegi atanýy úshin synaq tapsyrǵan.
Ásirese qazaq tiline kelgende shorqaqtaityn Elmira hanym “Qaztest” júiesindegi qazaq tilinen synaq tapsyryp, joǵary 135 ballǵa ie bolǵanyn estigende tipti, ne derimizdi bilmedik.
Sýhanberdievanyń izin ala Saǵadievtiń taǵy bir orynbasary Aslanbek Ámrin shetelge attanyp, bilimi men biligin kótermek eken...
Ádet pe, álde...
Baiqaisyz ba, qazir tutas bir salany basqarǵan shendiler ózine tapsyrylǵan jumysty aqsatyp alsa, sheteldegi oqýyn jalǵastyrýǵa asyǵatyn boldy.
Talai ákim men ministrlerdiń orynbasarlary shetelde oqýyn jalǵastyryp júrgenin jaqsy bilemiz.
Bir qyzyǵy sol qazaq tilinde eki sózdiń basyn qurap sóilei almaityn vitse-ministrler men ákim orynbasarlary «Bolashaq» grantynyń mindetti talabynyń biri "Qaztestiń" qazaq tili boiynsha synaǵynan qalaisha súrinbei ótip júr?
Ainaldyrǵan bir jyldyń ishinde Bilim jáne ǵylym ministriniń qos birdei orynbasary bilimin jetildirý úshin syrt elge attanýyn qalai túsinýge bolady?
Odan buryn Saǵadiev bilimi tolyq emes mamandardy nege jinap alǵan? Bul da zańdy suraq.
Saǵadiev orynbasarlarynyń qyzmetinen ketýiniń basqa sebebi bar ma álde? Sheteldegi oqýyn jalǵastyrý vitse-ministrlerdiń otstavkaǵa ketýiniń shynaiy sebebin búrkemeleý emes pe osy?
Áiteýir Ámrinniń otstavkasy kókeidegi kúmán-kúdikti zoraita tústi.
Saǵadievke jańa orynbasaryn taǵaiyndarda onyń bilimine, qazaq tilin jetik bilerine tolyq kóz jetkizip alýǵa keńes beremiz. Áitpese taiaqtyń bir ushy taǵy da ózine tietini anyq.
Aitpaqshy, bizder Aslanbek Ámrinniń qazaq tilinde sóilegenin kórgen de, estigen de emespiz.
Ǵylym damydy ma?
Aslanbek Ámrin Bilim jáne ǵylym vitse-ministri qyzmetin atqarǵan sátte ǵylym salasyn damytýǵa tikelei jaýapty boldy. Sonymen qatar áńgime basynda aitqanymyzdai ǵylymdy kommertsiialaý isiniń de tigizin jatqyzýdy moinyna aldy. Osy rette ǵylymi jobalardy kommertsiialaý isine qatysty az-kem áńgime aita ketsek.
Búginde Úkimet ǵylymi jobalardy qarjylandyryp keledi. Biraq ǵylymi jobalardyń nátijesin óndiriske engizip, kádege jaratý jaǵy kemshin túsip jatyr. Ǵalymdar ministrlik bólgen qarjyǵa jumystaryn júrgizip, ǵylymi jobalardyń nátijesin qaǵazǵa túsirip, tartpaǵa salyp qoiady. Bolǵan, bitkeni osy.
Al "Ǵylym týraly" zańda elimizdegi ulttyq kompaniialardyń tabysynyń 1 paiyzyn ǵylymi jobalardy qarjylandyrý baǵyttaý týrasyndaǵy talap, taiǵa tańba basqandai jazylǵan.
Ǵalymdardyń ǵylymi jobalarynyń nátijelerin óndiriske engizý úshin vitse-ministr elimizdegi ulttyq kompaniialardyń basshylaryn jinap, olarǵa qazaq ǵalamdarynyń ǵylymi jobalaryn óndiriske engizý týrasynda batyl talap qoiatyn, saiasi salmaǵy bar tulǵa bolýy kerek.
Al qazaq ǵylymynyń soiylyn soǵyp kelgen Aslanbek Ámrin ulttyq kompaniialardyń basshylaryna talap qoimaq túgili "bálen" dep áńgime aitatyndai harizmasy boldy ma? Árine bolǵan joq.
Sondyqtan bizder kelesi vitse-ministrlerdiń bilikti, saiasi salmaǵy bar tulǵa bolǵanyn qalaimyz. Áitpese qazaq ǵylym kóleńkede, eleýsiz kúiinde qalyp qoia beredi.
Dýman ESETULY
