Bastamany qolǵa alýdaǵy maqsat – otbasy, oshaqqasynda bolatyn janjaldarǵa tosqaýyl qoiý, shańyraq yntymaǵyn saqtaý. Ortalyqta erinen zábir kórip, zorlyq-zombylyq taýqymetin tartqandar men ishimdik pen esirtkige salynyp ketkenderge psihologiialyq qoldaý kórsetiletin bolady.
Ortalyqtyń saltanatty ashylýyna oblys ákiminiń orynbasary Erbol Sadyr, Sairam aýdanynyń ákimi Samat Saparbaev, QR Bas prokýrorynyń asa mańyzdy tapsyrmalary jónindegi aǵa kómekshisi S.Tursynbekova arnaiy qatysyp, pilottyq jobanyń mańyzdylyǵyna toqtaldy.
«Mundai ortalyqtardyń aýdan ortalyǵymyzda ashylýy óte mańyzdy. Aýdan turǵyndary qalaǵa sabylmai-aq osy ortalyqtyń kómegine júgine alatyn bolady. Pilottyq jobany júzege asyryp otyrǵan elimizdiń Bas prokýrotýrasyna alǵysymyz sheksiz»
- dedi aýdan ákimi Samat Saparbaev.
Óz kezeginde sóz alǵan «Otbasyndaǵy zorlyq-zombylyqsyz Qazaqstan» pilottyq jobasynyń jetekshisi Saltanat Tursynbekova ortalyqtyń jumys aýqymyn túsindirdi.
«Búginde barlyq qyzmet túrleri oblys ortalyǵynda ornalasqan. Osyndai ortalyqtardy aýdandardan ashýdaǵy negizgi maqsatymyz – aýyl turǵyndaryna kómek qolyn sozý bolatyn. Biz aýyl turǵyndarynyń jan-aiqaiyn, negizgi máselelerinen habardar bolyp otyrýymyz qajet. Búginde otbasylyq jaǵdaida turmystyq zorlyq-zombylyqtyń beleń alǵan kezeńi. Sondyqtan osyndai ortalyqtar túrli jaǵdaida qiyndyqqa dýshar bolǵan áielder qaýymyna kómek kórsetetin bolady», - dedi joba jetekshisi.
QR Bas prokýratýrasynyń bastamasymen ashylǵan sektor ǵimaraty qajetti bólmelermen qamtamasyz etilgen. Munda qabyldaý jáne dáriger bólmesimen qatar qajetti quraldarmen jabdyqtalǵan psiholog, trening, egý kabinetteri jumys isteidi. Atylǵan ortalyq bolashaqta barlyq memlekettik organdar tarapynan jasalatyn profilaktika jumystaryn úilestiretin birden-bir organ bolmaq.
Aita keteiik, dál osyndai ortalyq Saryaǵash aýdanynda da ashylǵan bolatyn. Bir aidyń aralyǵynda ortalyq 50-ge tarta azamatshaǵa áleýmettik kómek kórsetilgen.
Shara barysynda «Óz baqytyń ózińniń qolyńda» atty qaiyrymdylyq aktsiiasy ótti. Aktsiia aiasynda áielder qaýymyna arnalǵan túrli sheberlik saǵattary uiymdastyryldy.
