Eń aldymen oblys ákimi mingen tikushaq Badam ózenin boılaı ushyp, Tólebı, Túlkibas aýdandaryndaǵy taýly alqaptardy barlap shyqty. Sóıtip, taýly alqaptardaǵy muzdaq kólder ústimen áýeden sholý jasady. Taýly tóbesindegi kólde oblys ákiminiń tóraǵalyǵymen májilis ótti. Onda óńirimizdegi tasqyn sýdyń aldyn alý, qosymsha shaǵyn qoımalardyń qurylysyn júrgizý, Ógem ózeniniń sýyn tıimdi paıdalaný máseleleri talqylandy.
Kún tártibindegi ózekti másele boıynsha baıandama jasaǵan oblystyq tótenshe jaǵdaılar departamentiniń basshysy Nurbolat Derbisov ózen-kólderdegi tasqynnyń aldyn alý sharalarynyń barysyna toqtaldy. «Oblys aýmaǵyndaǵy ózen-kólderde 86,95 shaqyrymdyq qorǵanys dambalary ornatylǵan. Búginde olardaǵy qaýipsizdik jaǵdaılary jiti qadaǵalaýda», - deıdi ol.
Taýly alqaptardaǵy muzdaq kólderdiń búgingi jaı-kúıi týraly QR İİM TJK «Qazseldenqorǵaý» OQO aımaqtyq paıdalaný tehnıkalyq basqarmasy fılıalynyń dırektory Erbol Álzaq birqatar ózekti máselelerdi baıandady. Onyń aıtyýnsha, ótken jylǵy zertteý jumystarynyń nátıjesinde oblystyń taýly aımaqtarynda 40 muzdaq kóldiń bar ekeni anyqtalǵan. Onyń ishinde 7-i kómilgen kólder sanatyna jatady.
«Ońtústik Qazaqstan oblysynyń aýmaǵynda Qarjantaý, Ógem jáne Maıdantal taýly jotalaryna bıyl 1 ret aerovızýaldy jáne 4 ret jerústi zertteý jumystary júrgizilgen. Júrgizilgen zertteýlerdiń qorytyndysy boıynsha muzdyq kólderden tónip turǵan qaýip joq ekendigi anyqtalyp otyr», – dedi E. Álzaq. Aǵymdaǵy jylǵa oblys búdjeti tarapynan aerovızýaldy jumystaryn júrgizýge 32 mln. teńge qarastyrylsa, búgingi kúnge onyń 19 mln. teńgesi ıgerilgen.
Májilis barysynda óńir basshysy oblys aýmaǵyndaǵy tasqyn sýdyń aldyn alý, ózen-kólder men bógetterdiń qazirgi ahýalyn baqylaý, taý bókterindegi muzdaq kólderdi baqylaý boıynsha jaýapty sala basshylaryna tapsyrma berdi. Sondaı-aq Ógem ózeninen Saryaǵash, Maqtaral, Qazyǵurt aýdandaryna aýyz sý tartý maqsatyndaǵy jumystardy da nazarda ustaýdy tapsyrdy.
– Oblysymyzda jylda kóktemgi mezgilderde tasqyn sýdan qaýip tónedi. Osy rette aldaǵy jyly 30 shaǵyn sý qoımalarynyń qurylysyn júrgizýdi josparlap otyrmyz. Sonymen qatar Ógem ózeniniń sýyn aýyz sý rettinde paıdalanýdy qolǵa alyp otyrmyz. Ol úshin ózen bókterinen gıdroelektrostansıasynyń qurylysyn júrgizip, sý qubyrlaryn taý ústimen alyp ótý kerek. Bul rette ǵalymdar men tıisti sala mamandarymen tyńǵylyqty jumys jasap, iske asyrylatyn jobanyń qurylysyn sapaly ári tıimdi etip ázirleýdi tapsyramyn, – dedi J. Túımebaev.
Eske sala keteıik, bıylǵy jyldyń 15 aqpanynda Qazaqstan men Ózbekstan Úkimeti ókilderiniń ekijaqty yntymaqtastyqty jetildirý máseleleri jónindegi birlesken jumys toby basqosqan bolatyn. Atalǵan májiliste Ógem ózeninen sekýndyna 3-3,5 tekshe metrge deıin sýdy alyp, Qazyǵurt, Saryaǵash, Maqtaaral aýdany turǵyndaryna aýyz sý retinde paıdalaný máselesi qaralyp, oń sheshimin tapty.
OQO ákiminiń baspasóz qyzmeti
