Óńir basshysy bastaǵan ziialy top aldymen «Ana men bala» eskertkishine gúl shoqtaryn qoidy. «Qasiret» memorialyna jinalǵan qaýym náýbet jyldary qaza tapqandardy bir minýt únsizdikpen eske aldy.
Oblys ákimi óz sózinde totalitarlyq ozbyr saiasat júrgizgen qýdalaýdyń saldarynan qurban bolǵan azamattarymyzdyń túrmege qamalǵanyn, jazyqsyz jandardyń rýhyn ardaq tutý búgingi jáne keler urpaqqa júkteletin asyl mindet ekenin aitty.
– 1935-1938 jyldar aralyǵynda respýblikamyzda 113 myń adam qýǵyn-súrginge ushyrap, 25 myń qazaq halqynyń jáne Qazaqstan jerinde meken etken basqa da ulttardyń aldyńǵy qatarly ziialy, kórnekti uldary jazyqsyz atyldy. Qasiretti jyldary Ońtústik Qazaqstan oblysy boiynsha 2500 adam “Halyq jaýy” dep atyldy, – dedi oblys ákimi Janseiit Túimebaev.
Munan soń, minberge saiasi qýǵyn-súrginge ushyraǵan Kenbaevtar áýletiniń urpaǵy Qairat Býrahanov shyǵyp, zulmat zamannyń qiyndyqtaryn baiandady.
«Sol zulmat zamanda Kenbaevtar áýletiniń 10 azamaty jazyqsyzdan jazyqsyz sheiit boldy. Eki atamyz 1928 jyldary Shymkenttegi túrmede azappen, ashtyqpen óltirilse, qalǵan 8 atamyz jazyqsyz oqqa ushty»,- dedi qariia.
Shara barysynda kópshilik qaýym zulmat zamannan syr shertetin teatrlandyrylǵan qoilymdy tamashalady.
Eske sala keteiik, 1935-1938 jyldar aralyǵynda elimizdiń birtýar azamattary jappai qýǵyn-súrginge ushyrady. Keńes ókimeti halyqtarynyń 4 millionnan astam azamaty saiasi qýǵyn-súrgin men asharshylyqtyń qurbanyna ainaldy. Sol jyldary surapyl saiasattyń saldarynan 507 myń qarashai, sheshen, 180 myń qyrym tatarlary men 110 myń poliaktar, taǵy da kóptegen ult ókilderi Ońtústik Qazaqstanǵa kúshtep jer aýdaryldy.
OQO ákiminiń baspasóz qyzmeti
