Ońtústik Qazaqstan oblysy, Báidibek aýdany, Aqbastaý aýylynda «Tut baýyn ósirý jáne jibek sharýashylyǵyn damytý» taqyrybynda mamandandyrylǵan kóshpeli seminar-keńes ótti, dep habarlaidy blys ákiminiń baspasóz qyzmeti.
Oblystyq aýyl sharýashylyǵy basqarmasynyń orynbasary A.Qanybekovtyń jetekshiligimen ótken is-sharaǵa aýyl sharýashylyǵy salasynyń mamandary, qarjy uiymdarynyń ókilderi men aýdandardan jinalǵan sharýalar qatysty.
Seminar keńestiń tájiribelik bólimi Aqbastaý aýylyndaǵy Domalaq ana kesenesi mańyndaǵy tut baýynda jalǵasty. Atalǵan baý oblys ákiminiń bastamasymen júzege asqan «Shatqal» baǵdarlamasy aiasynda egilgen. Baýdyń jalpy aýmaǵy 55 gektardy quraidy. Onyń 30 gektaryna tut aǵashy, al 25 gektaryna shyrsha aǵashy otyrǵyzylǵan. Dál osy baýda jeke sharýa Sultan Bakirov jinalǵandarǵa jibek sharýashylyǵynyń kópshilik bilmeitin qupiialaryn aityp, óz tájirbiesimen bólisti. 6 jyldan beri jibek óndirisin zerttep júrgen Sultan Bakirov biyldan bastap jibek qurtyn ósirýge kirisken. Onyń aitýynsha, jibek qurtynan jylyna 4 mártege deiin jibek talǵashyǵyn alýǵa bolady. Kásipker alǵashqy ainalymnyń ózinen 110 keli jibek alýdy josparlap otyr. Jobasy tolyqtai júzege assa, ol jylyna shamamen 40-50 tonnaǵa deiin jibek talshyǵyn óndirip, 1000- nan astam jańa jumys oryndaryn ashpaq.
«Jibek óndirisi - álemdegi eń tabysty kásipterdiń biri. Jibek talshyǵy jibek qurtynan alynady. Al jibek qurtynyń negizgi azyǵy ol tut aǵashy. 1 gektar tut baýynan ortasha eseppen 48 tonna japyraq alynady. Máselen 1 keli japyraqty 20 teńgeden satqanda, 1 gektar tut baýynan 960 myń teńge tabys tabýǵa bolady. Al, 1 tonna japyraq, 1 qorapshadaǵy 19 gramm jibek kurtyn azyqtandyrýǵa jetedi. Ár qorapshadan 55 keli jibek óndiriledi», - deidi Sultan Bakirov.
Aita keteiik, jibektiń álemdik naryqtaǵy quny 1 kelisine 30-40 dollardy quraidy. Jibek óndirisi ásirese Qytai men Japoniia elinde qaryshtap damyǵan. Al, TMD memleketteri arasynda Ózbekstan jibek sharýashylyǵyn myqtap qolǵa alǵan. Keleshekte tabysy mol bul salany Ońtústik Qazaqstan oblysynda da damytý josparlanyp otyr.
Seminar keńestiń teoriialyq bólimi Aqbastaý aýylyndaǵy mádeniet úiinde jalǵasyn tapty. Jiynda jibek óndirisin damytýdyń múmkindikteri men tetikteri talqylandy. Sonymen qatar, aýyl sharýashylyǵy basqarmasynyń mamandary koopertaivterge birigýdiń tiimdiligine toqtalsa, qarjy uiymdarynyń ókilderi nesie alýdyń sharttarymen tanystyrdy.
