Bıyl Ońtústik Qazaqstan oblysyndaǵy 101 eldi mekenniń 425 myńnan astam turǵyny sapaly elektr jaryǵyna qol jetkizetin bolady. Ol úshin bıyl 59 elektr energıasymen qamtamasyz etý nysanynda qurylys jumystary júrgizilýde. Bul maqsatqa oblystyq jáne respýblıkalyq búdjet esebinen 11,3 mlrd. teńge qarastyrylǵan. Bul týraly oblystyq baspasóz qyzmetine silteme jasap, www.dalanews.kz saıty habarlaıdy.
Aıta keteıik, búginde oblys boıynsha elektr qýatyna jalpy qajettilik ortasha 400 MVt saǵatty quraıdy. Onyń 30 paıyzy ishki kózder esebinen óndirilse, 70 paıyzy elimizdiń soltústik óńirlerinen tasymaldanady. Aǵymdaǵy jyly Shymkent qalasynda "Bozaryq", "Astana 1,2" qosalqy stansıalarynyń qurylysy aıaqtaý josparlanyp otyr. Nátıjesinde qaladaǵy ónerkásip oryndary men 425 myń turǵyn sapaly elektr energıasymen qamtamasyz etilmek.
Budan bólek, 7 qosalqy stansıalardyń (Akjar, 1M1, 1M2, 2M1, 2M2, Novostroıka 1, 2) qurylysyn aıaqtaý kózdelýde. Bıyl sondaı-aq Saryaǵash aýdanynda 220/100/10 kV "Qyzylásker" qosalqy stansıasynyń qurylysy bastaý almaq. Bul maqsatqa 7,8 mlrd. teńge baǵyttalatyn bolady. Eger joba tolyǵymen iske assa, Saryaǵash, Maqtaaral, Shardara aýdandaryndaǵy 705 myń turǵyn men aýylsharýashylyq nysandary, ónerkásip oryndaryn úzilissiz, sapaly elektr energıasymen qamtamasyz etiledi. Iaǵnı, Maqtaaral, Saryaǵash, Shardara aýdandary ekonomıkasynyń ári qaraı damýyna qosymsha 50 MVt elektr energıasy paıda bolady.
Sonymen qatar, Ordabasy, Otyrar aýdandary men Arys qalasynyń aýmaǵynda ornalasatyn kásiporyndar men 244 myń turǵyndy turaqty elektr energıasymen qamtý maqsatynda "Badam" qosalqy stansıasynyń jobasy ázirlenýde. Atalǵan stansıanyń qurylysy 2018 jyly bastalady.
Oblystyq Energetıka jáne turǵyn-úı komýnaldyq sharýashylyq basqarmasy málimetine sáıkes 2018 jyly bastaý alatyn Tólebı aýdanyndaǵy «Alataý» qosalqy stansıasynyń qurylysyna 938,9 mln teńge bólinip otyr. 2017 jyly qýattylyǵy 3,5 MVt-ty quraıtyn Qazyǵurt jáne Saıram aýdandaryndaǵy 2 shaǵyn sý elektr stansıalarynyń qurylysy aıaqtalyp, iske qosylady dep kútilýde.
Osy jobalardy iske asyrý arqyly elektr jelileriniń tozý deńgeıin 2017 jyly 55,7 paıyzdan 54,8 paıyzǵa, 2021 jyly 52,4 paıyzǵa tómendetý kózdelýde.
Buǵan qosa, aǵymdaǵy jyly Shymkent, Arys qalasy, Maqtaral, Qazyǵurt, Saryaǵash, Túlkibas, Tólebı, Báıdibek aýdandarynda sapaly elektr qýatymen qamtamasyz etý maqsatynda jalpy 70 nysannyń jobalaý-smetalyq qujattary ázirlenýde. Sonymen qatar, «Ońtústik Qazaqstan oblysynyń elektr júıeleriniń 2030 jyldarǵa deıin damý shemasy» ázirlenýde.
