بيىل وڭتۇستىك قازاقستان وبلىسىنداعى 101 ەلدى مەكەننىڭ 425 مىڭنان استام تۇرعىنى ساپالى ەلەكتر جارىعىنا قول جەتكىزەتىن بولادى.  ول ءۇشىن بيىل 59 ەلەكتر ەنەرگياسىمەن قامتاماسىز ەتۋ نىسانىندا قۇرىلىس جۇمىستارى جۇرگىزىلۋدە. بۇل ماقساتقا وبلىستىق جانە رەسپۋبليكالىق بيۋدجەت ەسەبىنەن 11،3 ملرد. تەڭگە قاراستىرىلعان. بۇل تۋرالى وبلىستىق باسپا ءسوز قىزمەتىنە سىلتەمە جاساپ، www.dalanews.kz سايتى حابارلايدى.

ايتا كەتەيىك، بۇگىندە وبلىس بويىنشا ەلەكتر قۋاتىنا جالپى قاجەتتىلىك ورتاشا 400 مۆت ساعاتتى قۇرايدى. ونىڭ 30 پايىزى  ىشكى كوزدەر ەسەبىنەن وندىرىلسە، 70 پايىزى ەلىمىزدىڭ سولتۇستىك وڭىرلەرىنەن تاسىمالدانادى. اعىمداعى جىلى  شىمكەنت قالاسىندا "بوزارىق"، "استانا 1،2" قوسالقى ستانسيالارىنىڭ قۇرىلىسى اياقتاۋ جوسپارلانىپ وتىر. ناتيجەسىندە قالاداعى ونەركاسىپ ورىندارى مەن 425 مىڭ تۇرعىن ساپالى ەلەكتر ەنەرگياسىمەن قامتاماسىز ەتىلمەك. 

بۇدان بولەك،  7 قوسالقى ستانسيالاردىڭ (اكجار، 1م1، 1م2، 2م1، 2م2، نوۆوسترويكا 1، 2) قۇرىلىسىن اياقتاۋ كوزدەلۋدە.  بيىل سونداي-اق  سارىاعاش اۋدانىندا 220/100/10 كۆ "قىزىلاسكەر" قوسالقى ستانسياسىنىڭ قۇرىلىسى  باستاۋ الماق. بۇل ماقساتقا 7،8 ملرد. تەڭگە باعىتتالاتىن بولادى. ەگەر جوبا تولىعىمەن ىسكە اسسا، سارىاعاش، ماقتاارال، شاردارا اۋداندارىنداعى 705 مىڭ تۇرعىن مەن اۋىلشارۋاشىلىق نىساندارى، ونەركاسىپ ورىندارىن ءۇزىلىسسىز، ساپالى ەلەكتر ەنەرگياسىمەن قامتاماسىز ەتىلەدى. ياعني، ماقتاارال، سارىاعاش، شاردارا اۋداندارى ەكونوميكاسىنىڭ ءارى قاراي دامۋىنا قوسىمشا 50 مۆت ەلەكتر ەنەرگياسى پايدا بولادى.

سونىمەن قاتار، ورداباسى، وتىرار اۋداندارى مەن ارىس قالاسىنىڭ اۋماعىندا  ورنالاساتىن كاسىپورىندار مەن 244 مىڭ تۇرعىندى تۇراقتى ەلەكتر ەنەرگياسىمەن قامتۋ ماقساتىندا "بادام" قوسالقى ستانسياسىنىڭ جوباسى ازىرلەنۋدە. اتالعان ستانسيانىڭ قۇرىلىسى 2018 جىلى باستالادى. 

وبلىستىق ەنەرگەتيكا جانە ءتۇرعىن-ۇي كوممۋنالدىق شارۋاشىلىق باسقارماسى مالىمەتىنە سايكەس 2018 جىلى باستاۋ الاتىن تولەبي اۋدانىنداعى  «الاتاۋ» قوسالقى ستانسياسىنىڭ قۇرىلىسىنا 938،9 ملن تەڭگە ءبولىنىپ وتىر.   2017 جىلى قۋاتتىلىعى 3،5 مۆت-تى قۇرايتىن قازىعۇرت جانە سايرام اۋداندارىنداعى 2 شاعىن سۋ ەلەكتر ستانسيالارىنىڭ قۇرىلىسى اياقتالىپ، ىسكە قوسىلادى دەپ كۇتىلۋدە.

وسى جوبالاردى ىسكە اسىرۋ ارقىلى  ەلەكتر جەلىلەرىنىڭ توزۋ دەڭگەيىن 2017 جىلى 55،7 پايىزدان  54،8 پايىزعا،  2021 جىلى 52،4 پايىزعا  تومەندەتۋ كوزدەلۋدە. 

بۇعان قوسا، اعىمداعى جىلى شىمكەنت، ارىس قالاسى، ماقتارال، قازىعۇرت، سارىاعاش، تۇلكىباس، تولەبي، بايدىبەك اۋداندارىندا ساپالى ەلەكتر قۋاتىمەن قامتاماسىز ەتۋ ماقساتىندا جالپى  70 نىساننىڭ جوبالاۋ-سمەتالىق قۇجاتتارى ازىرلەنۋدە. سونىمەن قاتار، «وڭتۇستىك قازاقستان وبلىسىنىڭ ەلەكتر جۇيەلەرىنىڭ 2030 جىلدارعا دەيىن دامۋ سحەماسى»  ازىرلەنۋدە.