Astana qalasynda Ońtústik Qazaqstan oblysy kúnderi aıasynda «EKSPO-2017» halyqaralyq  kórmesine  arnalǵan  aýylsharýashylyǵy  ónimderiniń  jármeńkesi bastaldy. Eki kúnge josparlanǵan sharada ońtústikqazaqstandyq taýar óndirýshiler  jalpy quny 265 mln teńge bolatyn ónim ótkizbek. Onyń ishinde et jáne et ónimderi 104 tonna, kókónis 188 tonna, sút ónimderi 54 tonnany quraıdy. EKSPO qonaqtary dámi til úıirer Shardaranyń qaýyn-qarbyzy, Túlkibastyń almasy men Saryaǵashtyń qyzanaǵynan dám tatsa, al jármeńkege barǵan sharýalar ónimderin satyp qana qoımaı, halyqaralyq sharany tamashalaýǵa múmkindik alyp otyr.



«Búgingi sharaǵa ońtústik sharýalary erekshe daıyndyqpen keldi. Mundaǵy baǵalar bazardaǵydan 20-25 paıyzǵa arzan bosatylýda. Kelýshilerdiń basym kópshiligi et jáne sút ónimderine qyzyǵýshylyq tanytýda. Jármeńkeniń eń basty ereksheligi retinde mundaǵy aýyl sharýashylyǵy ónimderiniń tabıǵı tazalyǵyn aıtsaq bolady», - deıdi oblystyq aýyl sharýashylyǵy basqarmasy basshysynyń orynbasary Turǵanbek Ospanov.

Bul Ońtústik sharýalarynyń EKSPO aıasyndaǵy 5-shi jármeńkesi.   Negizgi tártipke saı otandyq ónimder qala turǵyndary men qonaqtaryna jármeńke túrinde usynylýda. Jalpy Ońtústik Qazaqstan oblysy EKSPO kórmesi aıasynda 6 ret jármeńke uıymdastyrýdy josparlasa, osy aralyqta Elordaǵa 12976 tonna aýyl sharýashylyǵy ónimderi tasymaldanbaq.



Bıyl oblysymyzda egis kólemi 20,7 myń gektarǵa artyp, 809,5 myń gektardy qurady. Tabıǵattyń qolaılyǵyna baılanysty bıyl óńir sharýalary mol ónim alýda. Máselen, búgingi kúnge oblys boıynsha 762 myń tonna kókónis, 1 mln tonnadan astam baqsha daqyldary men 208 myń tonna kartop jınaldy.

 

OQO ákiminiń baspasóz qyzmeti