Koronavırýs ınfeksıasynyń taralýyna baılanysty bul jolǵy májilis onlaın formatta uıymdastyryldy.
Bizdiń eldiń pozısıasyn Energetıka mınıstri Nurlan Noǵaev bastaǵan delegasıa bildirdi. Vedomstvonyń baspasóz qyzmeti habarlaǵandaı sharada álemdik munaı naryǵyndaǵy ahýal áńgime bolǵan.
Mınıstr Noǵaev OPEK+ uıymynyń ózara ýaǵdalastyǵy sheńberinde jahandyq munaı óndirisindegi jaǵdaı oń baǵytqa ózgergenin tilge tıek etti.
Qazaqstan kelisimge kiretin memleketterdiń qazirgi óndiris kólemin kóbeıtý týraly usynysyn qoldady.
“Kezdesý nátıjesi boıynsha OPEK+ elderi munaı óndirýdiń ázirgi kólemin uıymǵa kiretin memleketter 5,8 mıllıon barel mólsherindegi kúndik lımıtti esepke alyp, aı saıyn kúnine 400 myń barelge jýyq ujymdyq ulǵaıtý týraly uıǵarymǵa keldi.
Budan syrt bıylǵy jyldyń jeltoqsanynda OPEK+-ke birikken elder arasynda munaı-gaz naryǵynyń ahýalyn jáne keleshekte júzege asatyn is-sharalardy talqylaý maqsatynda májilis ótkizý týraly sheshim qabyldandy”, – dep jazylǵan habarlamada.
OPEK+ aıasyndaǵy mindetteme boıynsha bizdiń el aldaǵy aıda kúnine 1,4 mıllıon barel jáne budan keıin aı saıyn ortasha eseppen alǵanda óndiristi táýligine 16 myń barelge ulǵaıtyp otyrmaq.
#QazaqstanOPEK
