Syrt kózge sportshy, kópbalaly ári úlgili otbasy bolyp kóringen Álserovterdiń shańyraǵy búginde eldegi eń rezonansty qylmystyq isterdiń birine ainaldy. Almaty qalasy politsiiasynyń aǵa jedel ýákili Aslan Álserovtiń ólimine qatysty tergeý jalǵasyp jatqan tusta Stan.kz tilshisi onyń burynǵy áriptesimen sóilesip, marqumnyń qyzmettegi jáne ómirdegi bolmysy týraly pikirin bilgen, dep habarlaidy dalanews.kz.
«Biz ony “Slepoi” dep ataitynbyz»
Áriptesiniń aitýynsha, Aslan Álserov politsiiada tájiribeli jedel ýákilderdiń biri bolǵan. Áriptesteri ony atymen emes, «Basar» nemese «Slepoi» degen laqap atpen ataityn.
«Páter urlyǵy boiynsha óte myqty maman edi. Qaladaǵy eń tájiribeli jedel ýákilderdiń biri sanalatyn. Qylmyskerlerdi ustaý kezinde oǵan birneshe ret shabýyl jasalǵan. Pyshaqtalǵan, oq tigen, jaq súiegi men murny synǵan jaǵdailar da boldy», – deidi burynǵy áriptesi.
Onyń sózinshe, Álserov qyzmetine adal, tártipti ári sportty ómiriniń ajyramas bóligine ainaldyrǵan adam bolǵan.
«Balalaryna óte talapshyl edi»
Burynǵy áriptesi marqumnyń sportqa erekshe mán bergenin aitady. Balalarynyń da barlyǵy derlik túrli jekpe-jek sporttarymen ainalysqan.
«Úlken uly djiý-djitsýdan Aziia chempiony boldy. Balalarynyń bárin sportqa baýlydy. Ózi de únemi jattyǵatyn. Uzyn boily, dene bitimi myǵym jigit edi», – deidi ol.
Sonymen qatar onyń aitýynsha, Aslan Álserov bes ýaqyt namazyn oqityn, sabyrly adam bolǵan. Alaida balalaryna óte talapshyl áke retinde tanylǵan.
«Balalardyń kún tártibi qatań edi. Mektepten keiin sabaq oqyp, keshke deiin jattyǵýda bolatyn. Eger jattyǵýdy jiberip alsa, soǵan qatty ashýlanatyn. Biraq men ony qyzmette eshqashan ashýshań nemese aqyl-esi turaqsyz adam retinde kórgen emespin», – deidi burynǵy áriptesi.
Úlgili otbasy retinde tanylǵan
Osydan eki jyl buryn Álserovter otbasy «Qaiyrly tań Qazaqstan» baǵdarlamasyna qatysyp, jeti balasymen birge kópshilikke úlgili politseiler otbasy retinde tanystyrylǵan.
Baǵdarlamada Aslan Álserov 2008 jyly patrýldik politsiiada eńbek jolyn bastaǵanyn, al bolashaq jary Arailymmen qyzmet barysynda tanysqanyn aitqan.
Jubaiy Arailym Álserova kúieýin sabyrly ári baisaldy minezi úshin tańdaǵanyn aitsa, erli-zaiypty balalaryn sportqa baýlitynyn jetkizgen. Baǵdarlamada olardyń uldarynyń álem chempiondary ekeni de aitylǵan.
Qaiǵyly oqiǵa
Alaida arada eki jyl ótkende bul otbasy aýyr qylmystyq istiń ortasynda qaldy.
Almaty qalasy Áýezov aýdandyq politsiia basqarmasynyń aǵa jedel ýákili Aslan Álserovtiń denesi órtengen kúide Almaty oblysy Kegen aýdanyndaǵy taýly aimaqtan tabyldy.
Tergeý málimetinshe, qylmys Almatyda jasalǵan bolýy múmkin. Kúdikke marqumnyń jubaiy, kámeletke tolmaǵan uly jáne taǵy birneshe adam ilindi. Keiin jasóspirim kúdiktiler úiqamaqqa jiberildi.
Al olardyń qorǵaýshylary otbasy uzaq jyldar boiy turmystyq zorlyq-zombylyq kórgen bolýy múmkin ekenin málimdedi.
«Mundaidy syrt kóz baiqamaidy»
Burynǵy áriptesi otbasynda janjal bolýy múmkin ekenin joqqa shyǵarmaidy.
«Múmkin balalar anasyna arasha túsken shyǵar. Ókinishke qarai, otbasyndaǵy zorlyq-zombylyqty kóp jaǵdaida syrt kóz baiqamaidy. Ainalasyndaǵylar úlgili otbasy dep oilaidy», – deidi ol.
Sonymen qatar eks-politsei quqyq qorǵaý organdaryndaǵy psihologiialyq irikteý júiesi mundai jaǵdailardyń aldyn alýǵa tolyq múmkindik bermeidi dep esepteidi.
«Psihologiialyq testileýde bir suraq ártúrli formada qaitalanady. Biraq mundai test adamnyń naqty psihologiialyq jaǵdaiyn kórsete almaidy», – deidi ol.
«Jumystan ketkisi kelgen»
Áriptesiniń aitýynsha, birneshe jyl buryn Aslan Álserov qyzmetten ketýge de niettengen.
«Raport jazǵanyn estigenmin. Biraq keiin jumysta qaldy. Óz isin jaqsy kóretin. Degenmen politsiiadaǵy psihologiialyq qysym óte joǵary. Kúndelikti kúizelis, jaýapkershilik adamǵa áser etpei qoimaidy», – deidi burynǵy áriptesi.
Ol marqum týraly jaman pikir aita almaitynyn aityp, bul iske qatysty naqty qorytyndyny tergeý shyǵarýy tiis ekenin jetkizdi.
«Ne bolǵanyn naqty eshkim bilmeidi. Múmkin, bári shegine jetken shyǵar. Biraq men tanyǵan Aslan kásibi maman ári sabyrly adam edi», – dedi ol.
