Ońtústik Qazaqstan oblysynda osy jyldyń sońynda «Kóne jetigenniń syry» atty 13 seriialy kinohikaia men «Qajymuqan», «Otyrardy qorǵaý», «Kieli Qazyǵurt» atty animatsiialyq filmderdiń tusaýy kesiletin bolady. Bul týraly Óńirlik kommýnikatsiia ortalyǵynda ótken baspasaóz konferentsiiasynda «Ońtústik-film» kinostýdiiasynyń direktory Batyrhan Dáýrenbekov málim etti.
Atalǵan týyndylardyń túsirilim jumystarymen elimizge belgili «Saq» jáne «Ońtústik-film» kinostýdiialary ainalysyp jatyr.
Bul týyndylar Ońtústik Qazaqstan oblysy ákimdiginiń qoldaýymen Elbasynyń «Bolashaqqa baǵdar: rýhani jańǵyrý» baǵdarlamasy negizinde óńirimizdiń kieli jáne tarihi jerlerin dáripteý men týrizmdi nasihattaý maqsatynda túsirilip otyr.
«Atalǵan týyndylardyń ideia avtory – Ońtústik Qazaqstan oblysynyń ákimi Janseiit Túimebaev. Jyl basynda oblys ákimi bizdi arnaiy qabyldap, ishki týrizmdi damytýǵa sep bolatyn kino jáne animatsiialyq filmderdi túsirýge tapsyrma bergen bolatyn. Keiinnen biýdjetten qarjy bóldi. Qazirgi tańda biz «Kóne jetigenniń syry» atty 13 seriialy kinohikaiany túsirýmen ainalysýdamyz. Túsirilim jumystaryna 30-ǵa jýyq akterlar tartylyp, jumys júieli túrde jalǵasyp jatyr»,- dedi Batyrhan Qaldarbekuly.
«Kóne jetiginniń syry» atty kinojoba jelisi óte qyzyqty. Qazyǵurt asýyndaǵy jol jóndeý jumysymen ainalysyp jatqan ekskovatorshy kisi syrty shirýge ainalǵan teri qapshyq taýyp alady. Qapshyqtyń ishinen kóne jetigen aspaby shyǵady. Ishekteri men asyqtary joq bul aspabtyń syrtqy betinde eski kóne túrki áripterimen jazylǵan jazýdyń izderi kórinedi. Filmniń basty keiipkeri – Samal dos, jigiti Nurjan men arheolog Jandos úsheýi jetigenniń syrtyndaǵy tóte jazý óleń shýmaqtarynyń qupiia syrlaryn ashýǵa tyrysady.
«Kinonyń túsirilim jumystary Túrkistan, Arystan bab, Otyrar, Saýran, Sairam, Aqsý-Jabaǵyly, Qazyǵurt taýy, Ógem sekildi tarihi jáne tabiǵaty ásem jerlerde túsirilýde. Jalpy «Kóne jetiginniń syry» kinosyna 70 mln. teńge bólinip, ár seriiasyna 6 mln. teńge shyǵyndalyp jatyr»,- dedi kinonyń bas rejisseri Nýriddin Patteev.
