وڭتۇستىك قازاقستان وبلىسىندا وسى جىلدىڭ  سوڭىندا «كونە جەتىگەننىڭ سىرى» اتتى 13 سەريالى كينوحيكايا مەن «قاجىمۇقان»، «وتىراردى قورعاۋ»، «كيەلى قازىعۇرت» اتتى انيماسيالىق فيلمدەردىڭ تۇساۋى كەسىلەتىن بولادى. بۇل تۋرالى وڭىرلىك كوممۋنيكاسيا ورتالىعىندا وتكەن ءباسپاساوز كونفەرەنسياسىندا «وڭتۇستىك-فيلم» كينوستۋدياسىنىڭ ديرەكتورى باتىرحان داۋرەنبەكوۆ ءمالىم ەتتى. 

اتالعان تۋىندىلاردىڭ ءتۇسىرىلىم جۇمىستارىمەن ەلىمىزگە بەلگىلى «ساق» جانە «وڭتۇستىك-فيلم» كينوستۋديالارى اينالىسىپ جاتىر.

بۇل تۋىندىلار وڭتۇستىك قازاقستان وبلىسى اكىمدىگىنىڭ قولداۋىمەن  ەلباسىنىڭ «بولاشاققا باعدار: رۋحاني جاڭعىرۋ» باعدارلاماسى نەگىزىندە ءوڭىرىمىزدىڭ كيەلى جانە تاريحي جەرلەرىن دارىپتەۋ مەن ءتۋريزمدى ناسيحاتتاۋ ماقساتىندا ءتۇسىرىلىپ وتىر.

«اتالعان تۋىندىلاردىڭ يدەيا اۆتورى – وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ. جىل باسىندا وبلىس اكىمى ءبىزدى ارنايى قابىلداپ، ىشكى ءتۋريزمدى دامىتۋعا سەپ بولاتىن كينو جانە انيماسيالىق فيلمدەردى تۇسىرۋگە تاپسىرما بەرگەن بولاتىن. كەيىننەن بيۋدجەتتەن قارجى ءبولدى. قازىرگى تاڭدا ءبىز «كونە جەتىگەننىڭ سىرى» اتتى 13 سەريالى كينوحيكايانى تۇسىرۋمەن اينالىسۋدامىز. ءتۇسىرىلىم جۇمىستارىنا 30-عا جۋىق اكتەرلار تارتىلىپ، جۇمىس جۇيەلى تۇردە جالعاسىپ جاتىر»،- دەدى باتىرحان قالداربەك ۇلى.

«كونە جەتىگىننىڭ سىرى» اتتى  كينوجوبا  جەلىسى وتە قىزىقتى. قازىعۇرت اسۋىنداعى جول جوندەۋ جۇمىسىمەن اينالىسىپ جاتقان ەكسكوۆاتورشى كىسى سىرتى شىرۋگە اينالعان تەرى قاپشىق تاۋىپ الادى. قاپشىقتىڭ ىشىنەن كونە جەتىگەن اسپابى شىعادى. ىشەكتەرى مەن اسىقتارى جوق بۇل اسپابتىڭ سىرتقى بەتىندە ەسكى كونە تۇركى ارىپتەرىمەن جازىلعان جازۋدىڭ ىزدەرى كورىنەدى. ءفيلمنىڭ باستى كەيىپكەرى – سامال دوس، جىگىتى نۇرجان مەن ارحەولوگ جاندوس ۇشەۋى جەتىگەننىڭ سىرتىنداعى توتە جازۋ ولەڭ شۋماقتارىنىڭ قۇپيا سىرلارىن اشۋعا تىرىسادى.

«كينونىڭ ءتۇسىرىلىم جۇمىستارى تۇركىستان، ارىستان باب، وتىرار، ساۋران، سايرام، اقسۋ-جاباعىلى، قازىعۇرت تاۋى، وگەم سەكىلدى تاريحي جانە تابيعاتى اسەم جەرلەردە تۇسىرىلۋدە. جالپى «كونە جەتىگىننىڭ سىرى» كينوسىنا 70 ملن. تەڭگە ءبولىنىپ، ءار سەرياسىنا 6 ملن. تەڭگە شىعىندالىپ جاتىر»،- دەدى كينونىڭ باس رەجيسسەرى نۋريددين پاتتەيەۆ.