EKSPO halyqaralyq mamandandyrylǵan kórmesi aıasynda ótkizilip otyrǵan mádenıet kúnderinde oblystyń qolónershileri toqyma, syrmaq syrý, keste tigý, áshekeı buıymdar, aǵash buıymdaryn árleý, ismerlik, ustalyq syndy qolóner buıymdaryn ázirlep kópshiliktiń nazaryna usyndy. Sonymen birge, ulttyq mádenıetti nasıhattaýdy kózdegen ońtústikqazaqstandyq qolónershiler men sýretshilerdiń tól týyndylary jáne óńirdiń tarıhı, mádenı kelbetin aıqyndaıtyn 1500-den astam qundy jádigerleri nasıhattalýda.
Sondaı-aq, etnoaýyl ortalyǵynda «Túrkistan – túrki áleminiń mádenı astanasy» jyly aıasynda ótkizilgen is-sharalar men jýyrda ǵana ońtústiktiń kıeli oryndaryn kózben kórip, maıly boıaý arqyly órnektegen túrki álemi sýretshileriniń týyndylary da osynda qoıylǵan.
Ulttyq naqyshtaǵy kádesyı buıymdaryn daıyndaıtyn zańdy jáne jeke tulǵalar ulttyq qolóner týyndylaryn qonaqtarǵa tanystyrsa, 47 qolóner sheberi men 7 sýretshi arnaıy sheberlik sabaqtaryn ótkizip, ulttyq qolóner buıymdaryn ázirleýdiń qyr-syryn jınalǵan kópshiliktiń nazaryna usynady.
Esterińizge salaıyq, Ońtústik Qazaqstan oblysynyń ulttyq qundylyqtardy dáripteıtin kórme 29 tamyz ben 3 qyrkúıek aralyǵynda kúndelikti saǵat tańǵy 10.00 men keshki 20.00-ge deıin ótkiziletin bolady.
OQO ákiminiń baspasóz qyzmeti
